"Yeku be bibé katamba nana nyina, mi na yi tishi ezaba nana ga yi, Ann Asante! Eginda lo eba ezanazhi è cin yi le nbo na be nazhi dan katamba babo na.

Nyina, mi dan be ega na ezandoro è wa baza be nyi na. Mi è fanyagban ezaba be Bedzobedzo Zaman nyi nyina!

Oku, Bedzo-zaman. Gawama be bibe na wo à
baza be yi nyi katamba nana nyina na," Ann gan.

"Mi dajin be ezaba be mi nyi, Ann. Kici baye gan ò, mi gangan be bere mi nyi lo ba eza-katamba nana, mi ci ke tsa èzhè mi ba shempa nana ò a leyé?" Bedzo-zaman gbin à.

"Kubetun ì, e, kika be bere we gubàbà à fan enyazhi, Bedzo-Zaman," Ann zhe ù.

Wunci ke à be ù, "Ezakambazhi ya egwako ya Bedzo-Zaman."

"Lugwa mi ca be egangbin wonciko è. Acinga, ke ko ki è ye Bedzo-Zaman nyi ò?" Ann gbin ù gan.

Wun ke à be ù, "Mi kpe ke A.I. ga è ye 'Bedzo-Zaman' nyi ò na, wun dan nimi bawu gbèrègba komputa ò. Ama, ki wo yi ò A.I.? Yi è wa kpikpe enyana wo yi na."

"Mi ga yi ChatGPT nyi ò, ezhimi bedzobedzo zaman. Tsoci Ezhimi komputazhi ga jin mi nyi ò," Chat zhegan.

Ann à zhí, "Kpe emika nanazhi yé?"

"Ezhimi mi yi o na tsoci mizhi jin na ci à gangan wó be zawangizhi na. Titi-titi ga yi yi ò, na jin enyazhi wo kakanyi na. Wunjin kpátá è jin nyana mi jin wo na à," Chat gan be ù.

"Mi kpe ke sanwoci wo nyi ò na, ama ki wo jin wo be ò?" Ann gbingan.

"A jin mi jin ebo mi ba zawangi etunlo re. Ezhimi kpáká ga a jin mi nyi ò. Ezhimi na la mi è kpe nyana a ga gbin mi na Ci è ke yazhe eti enya kakanyizhi ò na," Chat yazhe.

"A fe ezhimi bedzo zaman wo yi ò, ce ba zawangi etunlo re," Ann gan.

"Wo ga à fe ezhimi na wonye na, a de enyanazhi wo jin wo be na?" Ann gbin ù.

"Acinga, tosun enyatswaci mi yi ò, mi jin enyana zawangi jinwo na wo. Ke, mi kpin enyazhi wo. Mi cin eganzhi le wo, mi ci à kpe kemina a jin nyana gonyi na be ù nyi. Mi kpe enya titi-titizhi ri wo, to enyakazhi kakanyi."

Chat gan be ù, "Mi kpin gwako enyana ezazhi jin kpátá na wo. Ke, mi gba gbakazhi, enyakazhi to kpe danadzùzhi be gwala sanwozhi wo."

Ann gbingan, "Enyanazhi wo kpe kpátá na yi a yi enya nashi zawangizhi ka ko jin na?"

Chat ci zhegan, "E ba, enyana ezazhi jin ko ka na ga mi è kpin jin ò."

"Mi è ya ezhe egangbin kakanyizhi wò gán zawangizhi. Mi jin enyazhi wò be egwatso è na à la zawangizhi eka na lokpa na.

Mi yi be kpikpe enyanazhi dokun na gán zeni. Mi baganti wo be enyanazhi mi kpe na. Mi ba we eganbati wo re eti enyana mi kpe eti wo bo na."

Ann ci gbin ezakatambagazhi gan, "Wun à yé ye na komputazhi à kpe enyanazhi yi kpe na?"

Wunci gbin chat gan, "Gan ya mi be ke komputazhi Zhezhe ci kpe enyazhi ye saranyi eti zawangizhi na ò?"

Chat zhegan, "Komputa de enya kpataki na è ba ù jinre kemina wun à lotunlo be gwako-eganzhi na. Ama, daga egankacizhi zawangizhi gabo mi è kpin ci è ka ò."

Chat gan, "Mi gba enyakikaci be na à kufi enyazhi ò na wo. Ezhimi nasara ga mi è la baza to de eganzhi gbani bedzò ò. Ama, mi ma kpin ezhimi ndoro wo."

Ann à cezun ù, "mi kpe ke wo kpe eganzhi ye dokun na. Wo mi è wó ètán ga ò? Ke bedzo-zaman wó ètán wó na ò?"

"Ezhimi kpáká komputa mi yi ò, mi è wótán ke zawangi na à.

Enya na tswa na mi yi ò, tsoci ezhimi komputazhi ga jin mi ebo mi ba zawangizhi etunlo re. Mi de yekpa ko wótán enyandoro à.

Mi jin enyazhi wo ya ezazhi ke eganzhe, ètànka, ezhimizhe lo ezhimi be egan wondanzhi."

"Ye wó nyana wuntso gan na! Enya wun yi ò na ezazhi tswa ebo zawangizhi ò na. Wun de à ke kemina yi à lotun lo be ù nyi kemina gonyi na!

Enya na ma yi de à labe ya ye nyina na ga dan ò na ò, akpesha, mi kpayetu gan ye de egangbinzhi dokun. Mi ga yi Ann Asante, gawama be cincinle yi nyi be bibé katamba nana!"