Iyange i genegh oo ta kyaang nahan, Khosi lu zenden kôndon, henen kwagh u una er yô.

Ngô u Khosi yar ken ityev undu un ken ya.

"Ka nyi me er a iyol yama?" Khosi kaa nahan.

"Me yem me za ôô uwe shin uwagh, kpa ka ana nan a za vereme?" Khosi hen ken shima nahan.

Hen shighe la je man Mama Sophie gba va karen u yemen shin uwagh. A tôô ikyese iv a akondo shin min sha ityo.

"M ngu zan vea Mama Sophie shin uwagh! " Khosi ôr ken shima na nahan.

"Me fatyô u dondon we u zan shin uwagha?" Khosi pine nahan. Mama Sophie se man kpegher sha ityo.

Er ve lu yemen la man Nozipho va kohol ve. Nozipho soo uwe u ôôn ga kpa a soo u teman nengen er i lu ôôn yô.

Mba za nyer shin uwagh yô Khosi kaa ken shima na er, "Nyian ne me kera ôô uwe hen ape mngerem ma ze ga er ka anmbayev ga! Me tese hanmaor er mfe uwe u ôôn hen ape mngerem ma ze yô."

A tsuwe a gba shin mnger, kpisha!

Nozipho lu kenger ken ica.

Er Nozipho lu kenger yô, mbayev cii saan ve iyol shin mnger.

Ve lu ôôn iyol yar yar je.

Ve lu ngoron yilan mbagenev shin mnger.

Nozipho shi kenger dedoo yô, kwagh kôr gema. Khosi lu ôôn uwe undun mbayev mbagenev. Nozipho za ikyua shi kimbir kenger dedoo.

Kwagh u yange nenge la cier un iyol, a yevese a za ape Kasev mbagenev kpa lu kiren akondo ve shin uwagh yô.

"Wase nen! Khosi ngu miren shin uwagh," Nozipho gba ngoron.

Er ipelegh ashee nahan, Mama Sophie tsuwe gba shin mnger. A gba ôôn uwe senen.

A nyôr shin mnger shi a due, lu keren Khosi. A za gba Khosi sha uwegh man ôô yem a na hen ape mngerem za ga yô.

Mama Sophie man kôr Khosi due a na shin uwagh kera.

Mama Sophie er fefa kar hen ape mbayev man kasev mba ve kohol ve lu vaan shi geren la.

Nozipho lu yevese van ken jime er Mama Sophie di lu torough yemen a Khosi ken iyoughci la.

Kwase twer Noxolo nyôr a Khosi ken iyough fese, kasev mbatwerev mbagenev mbela kpa lu fele fele u wasen.

"Kwagh er un ga! Se mba a ikyôr er a shi shin mnger gbem ga yô!" Kwase twer Noxolo kaa nahan.

Mama Sophie shir shima.

Hanmaor hen iyoughci la gba wuese un sha shima taver man uwe ôôn u fan.

"M wuese er m fetyô u waren uma u or yô," Mama Sophie kaa nahan a iyol hiden jime je.

Ibyaver ar a tor u hen ijiir la. A tindi er i za va a Mama Sophie.

Mama Sophie pase tor er i hii man un hingir u fan uwe ôôn yô.

"Er mlu wanye la, ijende yam lu ya uwagh yande la. Mngerem lu kwagh u eren a min hanma yange. Nahan gba u se hen uwe u ôôn!" ka ape a kaa la.

Tor lôhô mtem man yôô her er una na Mama Sophie iyua sha shima taver na la.

Kasev haa awer kelelelele, nomso di tôngo ihyondo, mbayev ger a iember.

Hii iyange la je mbayev hii u soon u dondon Mama Sophie jime a icam zwa er, "Makwagh a bende amo ga, er Mama Sophie kwase u taver shima la, alu ikyua a mo yô!"