Ntɛw mvu wvu caan Malawi to kɛŋke yew ŋwaʼ yimi ɛ yí nu lo fiew jɛɛy.

Bó to teŋe lɛ Chiko, ɛ ɛ̀ nu lɛ keŋkoŋɛn ɛ bó ci lo.

Yew ŋwaʼ yese to nu bvudvuu bvu keŋkoŋɛn e bô keegɛɛ ɛkolɛ yidvu.

Yí to nu fô boom bo boŋkfu le diɛwɛ me le.

Bofow bò comkene, jee to nu ɛ gem yew yese ŋwaʼ kɛnɛn.

Ɛ̀ to nu bò yɛɛle lawkene, bò baa diɛwɛ diuu le noo bò
lɛɛtene nɛn ndemmm.

Yew ŋwaʼ yese to nu bvudvuu bvu njoŋ e.

Bó to nyaa mwɛɛm mvudieen bô ndvú yi yew ŋwaʼ le ɛ̂ bese ɛcici.

Fifin to gee ɛ bese yaa kɛŋke nfan kɛ, bvuu duŋci lɛ bó
kooŋke bese.

Ɛ́ ɛ̀ baa nu yew ŋwaʼ yin, tu kɛ me mbe ŋkee keensaŋ kɛnɛɛ ntaŋ ŋwa' kɛ.

Kɛ me mbe nɛlo enjo mwɛɛm nteen entaŋ kɛnɛɛ eŋkiɛɛ binfɛ bì jee ɛ̂ boŋwaʼ le kɛ.

Bikuu bi yew ŋwaʼ le bô bo n'yɛɛyi le to nu lo diɛwɛ kfuu disɛse le.

Bó to gee ɛ bese yenyi kɛŋke wvuy, ɛ bó ɛ jo tɛn bese yî bó le.

Ɛdiuw ɛcii yew ŋwaʼ le to nu kɛ lo fiɛɛ fì fifɛ.

Bese to nu ɛ yɛɛyi bese keefici bonyii bô keenyaa keyoone yî mwɛɛm mvusɛse le.

Me nto mbaa n'yɛɛyi kɛ keensaŋ bô keentaŋ kɛ. Ɛ̀ to nu tɛn no me nɛlo enlooci nu wee.

Ɛ me n'yɛn lɛ, yî keŋkoŋɛn e, bô gee dì jee noo ŋwaʼ, kɛ
fiɛɛ nɛlo eghaw beene kɛ.