Document

Bese Cee ɛ̂ Bvutɛɛli le

Nina Orange

Vusi Malindi

Bonyii cee dikfuu di yéw e. Yimi nu ɛ bó yoote bô mwɛɛm mvù beene yɛne kɛ lo mvú le diɛwɛ ɛgay e. Yoote yimi bô mwɛɛm mvù ɛ̀ keenci bonyii, kɛ diɛwɛ binlɛɛy bô kencaa kè bó ɛ fiysɛn bô taan di bala le.

Yéw yimi diɛwɛ bvutɛɛli wvun e nu ɛ bó yoote bô mwɛɛm mvù beene yɛne kɛ lo mvú le noo mvù bó keenci lo le.

Kabo bô Thabo cee Keba ke Kgatleng le mbew ntɛw wvù Mochudi le woŋ wvu Botswana le. Bó cee ɛ̂ bvutɛɛli le bô icee bó noo bwee bó.

Ɛ Kabo nɛle lɛ, "Bvutɛɛli nu yew woŋ ɛ yí nu kediɛŋci ɛ bikuu bidvu nu ɛ bó saŋ lo bô yun. Yéw yin nu ɛ bó yoote mondvuum e nteen ɛ̂ keba ke Aflika je ɛkuɛku le."

Ɛ Thabo gɛn fwe gay lɛ, "Bobvutɛɛli nteen ké no nu kediɛŋci le, kɛŋke diuw fwese bô bontoo yî dvú le. Bontoo bosɛse nu ɛ bó kene bô binlɛɛy, ɛ kɛ bó to shiee nu nonɛn fwele kɛ."

Ɛ Kabo gay lɛ, "Icee cee wese to yoke bvutɛɛli wun ɛ̂ je nce woŋ e. Icee wese nu ɛ bise wase mwɛɛm mvu n'yoo le mvu ɛbɛn yî dvú le."

Ɛ Kabo cu ntaŋ lɛ, "Beewo enɛle no bó ké no yoote."

Ɛ wvú gay lɛ, "Bó ké yoo bô bite, yun, ɛta, kencaa noo fiɛɛ fì bó fiike dvú.

Bó ké yaw cim kentuke, mum kase yiŋsɛn bô ɛta yo caan caan noo nshɛ bô monshiɛɛm. Ɛ fifin ge ɛ kenffuy no tɛmyi ntay."

Ɛ Thabo gɛn fwe gay lɛ, "Bonyii bo n'yoo le ké jo bite bì dewkene leeshɛ ŋgem e ŋgem e ɛ bí ley gɛn ɛ̂ kenffuy e. Ɛ bó mum kay bite bidvu keege bitow bi bimbew e ɛkfuŋ.

Kaŋmwaaŋ seke bó ɛ ge wase n'yoo ɛ leke keba ke baay we, ɛ bonyii bo n'yoo le mum jo ɛta gɛɛyɛ mbew bitew biɛ le."

Ɛ Kabo gay lɛ, "Keegɛn fwe, ɛ bó jo nshɛ kelay bô joo noo cuu na' mum som. Nonɛn, mum kɛŋkɛ kencaa ke lɛŋ kè tɛmyi naa ntay seke kí ɛ yum. Bó ké tum kencaa kedvu ɛntelɛŋ jo ɛta keege lɛ yó enù bvudvuu bvumwaaŋ."

Ɛ Thabo bise lɛ, "Seke bó ɛ yoo bo ɛta noo kencaa ɛ bimbew bidvu no tɛmyi baay nɛlo ece egɛn njenjole."

Ɛ Kabo gay lɛ, "Bimbew bi ɛkfuŋ nu ɛ faŋkɛn baaŋke bvutɛɛli."

Ɛ Thabo nɛle lɛ, "Keebaaŋke nu lɛ ɛnte ké no lɛɛntene seke ɛkfuŋ tone. Kɛ mvum nɛlo etone leyte yew yî bimbew e kɛ."

Mondvuum mo kenton ke baay e nu ɛ mbaŋ wvun ké no gee ɛ bvutɛɛli yvuwse ɛnte."

Ɛ Thabo gay lɛ, "Bonyii bo kembom e ké seyse yew fokuse ɛ ɛ̀ nu bô kencaa ɛ bó ɛ yiŋsɛn yî kenffuy kè bó ge le."

Ɛ Kabo gay lɛ, "Keemɛse yew fokuse nu ɛ bó ké bvuu tfuw kencaa mum laŋ fokuse. Ɛ́ kí ké yum tɛme mum ge ɛ yew fokuse no nu bataa sɛ bintuke."

Ɛ Thabo gay lɛ, "Kemɛse ke lemme le nu keebense bikuu. Bvutɛɛli ké no kɛŋk bikuu ɛ bó saŋ lo ɛ bí ɛ coontɛn.

Bonyii bo nʼyoo le ké yoo bikuu bô bite ɛ bó ɛ jicɛ ɛ taashɛ fontelɛŋ. Ɛ bó mum jo yun yomsɛn kay yî bite bidvu le. Kɛ bikuu bì bó saŋ lo nu ɛ jaŋ nɛlo eley yî dvú le kɛ.

Yun nu fiɛɛ fi jee fo bikuu bi yew. Geenɛn, no beene yɛne kɛ lo yí le, yí nɛnʼyi no nu la di lɛŋ fô biŋkaaŋ bô nyám yimi le keecee fó. Mwɛɛm mvun nteen beete lo bô fiɛɛ!

Taa kenjiŋjiŋ ɛ́ wo eyɛn: boncagugu le botɛte, ŋgam, fintfuw, shew, noo fiŋguu le.

Mwɛɛm mvu nʼyoo le diɛwɛ yun e, nu bvudvuu bvu lɛŋ fo boncagugu le keecee fó gomte fiɛɛ fì bó diee.

Kɛ boncagugu beete bô yun kɛ, bó ké no kuuŋke lo biŋkaaŋ bimew.

Bese kɛŋke keetaale fo yun e fo mwɛɛm diɛwɛ mvuŋguum bô ŋkáw noo shéw ebeete dvú kɛ.

Ɛ Thabo taa no bó saŋ bvutɛɛli bô yun gay lɛ, "Beene duule baay bò cee dvun!" Wvú fane boncagugu baay.

Ɛ Kabo bife bô nfan lɛ, "Kɛ me ŋkee laa ɛ̀ cee kfuu mwɛɛm mvu la bô beene dvun ɛ?"

Ɛ Kabo kase kiee gay lɛ, "Bikuu bi bvutɛɛli wɛm e nu ke enu bibaŋ bi bala le bì bó yoŋ lo."

You are free to download, copy, translate or adapt this story and use the illustrations as long as you attribute in the following way:

Bese Cee ɛ̂ Bvutɛɛli le

Author - Nina Orange, Ursula Nafula
Translation - Njah Alfred Njinyoh Nfon Protus Djin
Illustration - Vusi Malindi
Language - Nooni
Level - Longer paragraphs