Madina nu wan wvù ŋgaywee ɛ ɛ̀ nu kpwoon ɛ̂ kfuu di Kalembe le.

Bó cee Bandiagala.

Ɛ ɛ̀ ke no nu ɛkiɛguu jomew, ɛ Madina gɛn keefaa kembuŋ.

No wvú gɛn, yɛn wan kpwoon bô wan diemsɛn e.

Diuw to nu ɛ yum Madina keeyɛn boom bo caan e bofɛɛ ɛ wee yaa kee bó kɛ.

Ɛ wvú tee ice lɛ, "Baa! Baa! Boom bo caan bofɛɛ nu ɛ̂ yew fwese."

Ɛ ice lewtɛ buy gɛn diuw fwese le.

No wvú yɛnɛɛ boom bodvu le bife lɛ, "Ben nu baa? Ben buy fɛɛ?"

Ɛ wvu diemsɛn tfuse lɛ, "Me nu Assama, bee Yakolomo, jɛme yɛm yi caan."

Assama bô Yakolomo to nu ɛ dose baay, kɛŋke nfan, nu shen shen.

Ɛ Assama gɛn fwe nɛle lɛ, "Bese buy ntɛw wvù Songho le, gbwen wvù Doukombo le."

Ɛ ye bɛm Baa ɛ wvú ma fiɛɛ fì wvú ejeme.

Ɛ Madina gay lɛ, "Baa, lese bó yew. Bó nu ɛ dose baay ɛ jeŋ yuu bó. Bó shieele beene."

Ɛ Yakolomo jeme yî kaŋ we wvu fwe le gay lɛ.

"Bonyii se nu ɛ laa jem ntɛw wese le. Bese ɛ lase icee wese bô bwee wese noo fiɛɛ ficii."

Ɛ wvú gɛn fwe no jemyi ɛ diɛw doose wase nɛn.

Ɛ wvú gay lɛ, "Bese nu ɛ lɛn wase ɛdiuw e, yaa kee fô bese egɛn kɛnɛɛ fiɛɛ keege kɛ."

Ɛ Baa mum yene can ye, bam boom bodvu ŋocɛ.

Ɛ wvú gay lɛ, "Ben eley eto boom bem, yin nu yew yene. Beene nu ke ejeme seke ben ɛ lɛɛtɛn."

Ɛ boom bodvu taashɛ bô kfuu, diekɛn mwɛɛm mvudieen mvù fwele mvù yvuwse ɛjim jo ɛdiuw nteen.

Ɛ bó mɛse, ɛ Madina jo boom bodvu ley gɛn bô bó fò bó nu ecee le.

Ɛkɛw ɛbvubwɛ le, ɛ bó mum jo Assama bô Yakolomo diɛwɛ bonyii bo kfuu di KALEMBE le.

Ɛ bó no dvumte bvuu gee dilemme di yew dicii bô boom bo yew.