Telna to nu wee yaa kɛŋke fo nce kɛ. Mwɛɛm mvudieen mwew to nu mvuntam mvu ŋkpwaante.

Wvú to ké ja ce ŋkpwaante ɛ biguŋ bô bicuum ɛ shii yî bite le ɛ no taale wvú.

Wvú to ghane ɛkow yɛne bite le nteen nteen.

Ɛ wvú ke nɛ kpwawcɛ lɛ, "Bite bin nu fɛn nɛn laa kɛ lo ɛcici."

Ɛ wvú ke ghan dose, shii fokuse, yeem yî kete kemew e, mum lefe.

Ɛ bite baŋ wvú fo mvum ebawte wvu, ɛ mvunyiim no bile ɛ wvú ɛwe yemte boŋkiee bo jee.

Ɛ ntaŋ ke nɛ to ɛ̂ wvú ɛfa, ɛ wvú gay lɛ,

"Ɛ́ me ŋgbwo lo bite bin bimew, ɛ́ me ŋge bigew yî dvú le, eŋkɛŋkɛ yéw nteen."

Ɛ wvú mum nɛ gɛn ɛlaante, gɛn lɛkɛ nyo yì bó sɛɛle bite dvú, mum to kɛw no sɛɛle bite biɛ.

Ɛ kecuum lɛkɛ wvu gay lɛ, "Kee, fo wo egbwo kɛ. Ɛ̀ nu la dì bee bo mvunyiim e, ɛ mvuntan mvudvu nu mwɛɛm mvudieen mvusɛse."

Ɛ Telna tfuse lɛ, "Me nshieele bigew keen'yoo diem la."

Ɛ kecuum gay lɛ, "Ɛ̀ nu ken'yɛɛ ɛjisɛ keesaw la di nyám e nteen bô mvunyiim keeyoo diuw."

Ɛ Telna yuw, ɛ shén koo wvú. Ɛ wvú laŋ nyo yɛ fokuse, bam kecuum ŋocɛ.

Ɛ nsaa ye wvù kecuum cu ntaŋ lɛ wvú etum nshɛ, egom bite bì yum, mum eyoo cun dvú, esaŋ bô yun.

Lɛ ɛ́ wvú ge nonɛn, ɛ́ bó bocii emum ekɛŋke ɛla.

Ɛ Telna bee, mum no laale ghane ɛ̂ kecuum e ɛfonɛfon. Ɛ kecuum cinɛ lɛ wvú ekoyte mvuntam nteen, gbwole bite bì yum no wvú nulo egbwo.

Ɛ bô wvú tu wee bô nsan naa baay.