Bonyii cee dikfuu di yéw e. Bomew cee yéw yì bó bom ɛ yí nu ke enu dvu egɛn ebuy ntamndwee, ɛ bomew cee yéw e ɛ yí nu ke enu kɛ yî kefew e nɛn caan.

Ŋwa' wvun nu ɛkumɛ bvudvuu bvumew ɛ bó teŋe lɛ manyata ɛ bonyii ké no cee fó kɛ yî kefew e caan, ŋkpwaante, cún e.

Ŋkpwaante jaŋ nu je ɛweɛwɛ jo kentelɛŋ ke woŋ wvu Kenya le, keba ke Sambulu le. Ŋgón bokɛnɛ, Siday bô Naeku cee cun miaaŋ e. Icee bó bô bwee bó noo waa bwee bó wvù caan, wvù ɛ̀ nu diemsɛn cee yibo cun e.

Waa bwee icee bó bô boom bo bwee bó le botɛte bo ŋgaybonyii, cee yibo cún e bô dikfuu dibole.

Dikfuu dibole ké no kumte bona' bobole yî ntaashɛ le, fici bikuu bibole. Kɛ bó ke ce bvudvuu bvumaaŋ gɛn buy ncenjole kɛ. Bó ghane kɛ lo gomte mondvuum mo monfɛm ɛ̂ nyám yibo mò ɛgay nu fó.

Ŋkpwaante jan nu ɛ bó ɛ tum ketaaŋ bô bíay ɛ kɛnɛn. Ketaaŋ kin gemte lɛ fo nyam nɛlo ebuy, kɛnɛɛ lɛ fo wee wvù ncɛw eley kɛ.

Ɛ Siday gay lɛ, "Keeyoo cún yin nu ɛ bese ké kɛw baancɛ mwɛɛm mvù bó yoote dvû kɛ fò bese nu. Bese ké gom tíɛw bite yì bó nu ke tum kɛnɛn ɛ́ cun sɛ leem."

Ɛ Naeku bise lɛ, "Bese kee keegom kɛ ɛ ɛ̀ nu mwɛɛm mvu woŋ e keeyoo ɛla yese dvú. Wee tfuu ŋkpwaante ké ficɛ seke n'yoo le."

Ɛ Siday nɛle lɛ, "Bese ké jo tíɛw yì faŋkɛn keetum ege bimbew bì tɛmyi dvú. Bó ké kay bikuu bi cun e yî kembew e bo bontaŋ, keege lɛ cun yidvu yicii eleeme tɛmyi."

Ɛ Naeku bise lɛ, "Bikuu bi cún e ké no kfufe, keege lɛ fí etemyi fò fwefwe le keebaa."

Ɛ Siday gɛn fwe lɛ, "Seke bó ɛ tum wase tíɛw yi faŋkɛn bimbew ɛ leem, ɛ bó mum jo yi caan caan faashɛ ɛntelɛŋ."

Ɛ Naeku bise lɛ, "Bese ké seyse yun ɛ yí ɛ faŋkɛn, mum saŋ bikuu bi cun e dvu."

Ɛ Siday bvuu bise lɛ, "Bó saaŋke cun ntay, ɛ yí no baaŋke jaŋ bô mvum."

Ɛ wvú kase bise lɛ, "Bikuu bi cún yese le nɛlo enu bataa kɛnɛɛ kediɛŋci."

Ɛ Naeku gay lɛ, "Keetum cun bô nshɛ nu fiɛɛ fì me ŋkooŋke baay yî n'yoo le. Bese ké tow nshɛ bô cuu na' mum kɛŋkɛ kencaa keetumte yî kembew e, yiŋsene bibuw yî dvú le. Fifin baaŋke fwefwe bô kebvu keeleyte yew."

Ɛ Siday gɛn fwe gay lɛ, "Bó ké elese kencaa ɛ̂ bonsan e ntay yî bimbew e, ɛ fí baŋ bibuw bicii seke bimbew bidvu ɛ yum wase. Bese ké tum tɛn bimbew ye le bo kencaa. Seke kencaa ɛ yum wase no tɛmyi naa baay."

Ɛ Naeku bise lɛ, "Kɛ bimbew ké no kɛŋke bontoo kɛ. Geenɛn, ɛ kembuŋ kè bó kene bô kete ké no nu yî dvú le."

Ɛ Siday gay lɛ, "Seke bó tumte bimbew bi cun e, tu ɛ̀ nu lɛ bó gomte keelay lo. Ɛ Naeku bife lɛ, "Keelay lo, nu lɛ la?"

Ɛ waa bwee tfuse lɛ, "Bimbew bi cun e bì bó nu ɛ tum bô kencaa noo cuu naa ké no fici keegee lɛ cun elɛɛtene ɛnte seke ɛkfuŋ tone. Seke mondvuum lɛɛ, ɛ bibiɛ bimbew no fici keegee lɛ keŋkfum ke ŋguy e, emɛyte cun, gee ɛ yí yvuwse ɛnte."

Ɛ Siday nɛle lɛ, "Bonyii bocii ŋkpwaante ké ficɛ keeyoo cún, seke bese nɛn'yi, ɛ wee tfuu kase ficɛ keesaw.

Kɛ fí tɛmyi keesaw cun, ejo mwɛɛm mvudvu ekase egɛn eyoo yimi dvu bvudvuu bvumew e kɛ."

Ɛ Siday gay lɛ, "Kɛ mwɛɛm mvù bese yoote dvú jite kɛ, nonɛn yaa ghaake keetuu kɛ. Bese ké tuu mvù kɛŋke shiee diɛwɛ bikuu bi cun e bì bó nu ɛ saŋ wase le yî bokamɛl e kɛnɛɛ yî bimbɛɛbey e seke bese nɛn'yi."

Ɛ Naeku bise lɛ, "Bese nulo egom tɛn mwɛɛm mvu n'yoo le fò bvudvuu bvu fwɛ bvù bese gɛne fó le."

Ɛ Siday gay lɛ, "Ɛla yese nu ɛ kocɛn bô nce wese, no bese ghane lo we bô nyám yese."

Ɛ Naeku gay lɛ, "No bese ghane lo nu ɛ kɛ bese nɛlo enu yew ŋwaʼ le sekecii bô nsáa yese kɛ."

Ɛ Siday bise lɛ, "Yew yese ŋwa' ké cinɛ ɛ bese foo boŋwaʼ keebii n'yɛɛyi dvú no wvú gɛne yew ŋwa' le."