Document

Bese cee yew yì kumte ɛbulɛ le

Nina Orange

Kenneth Boyowa Okitikpi

Bonyii cee dikfuu di yéw e nteen. Bomew cee yéw e ɛ yí defe ɛwe ɛke, ɛ bomew cee yì nu fokufoku le.

Yéw yì dewkene ɛwe nɛlo ekɛŋke ɛla nteen ɛ bó ɛ bom ɛ mɛmsɛn lo. Ŋwaʼ wvun nu ɛkumɛ keebom yew yì defe kumte ɛbulɛ le, kɛŋke biŋkente nteen.

Mishelle bô Katɛline nu wee bô waa bwee. Mishelle shɛɛte caan keemɛse ŋwa' wvù baay, ɛ Katɛline wase yew ŋwaʼ yi fo keŋkɛwcɛ.

Jɛ́me yin cee bô icee bó noo bwee bó bô bwee bwee bó. Bó cee yew e ɛ yí defe ɛwe ɛke Nailobi. Bó kooŋke keecee ɛwe taale lo kelaante ɛkuse diɛwɛ mvunyiim yî kete kè defe le.

Kfuu didvu cee ɛ̂ keba ke 22 yî yew yì defe naa ntay e. Bó ké ley ɛ̂ fiɛɛ fimew fokuse, ɛ fí mum jo bó ben dvú yew.

Katɛline dioo bene booke no taaŋke biŋkente bi yew e. Wvú gomte keeke eguute kenfioŋ. Mishelle gomte fiew keeke enu wee kembom wvu baay, bomte yéw yì kumte ɛbulɛ le.

Ɛ Katɛline bife lɛ, "Kɛ yew yese beene defe fele yéw yicii Aflika?"

Ɛ Mishelle tfuse lɛ, "ʼAay, yew yin nu diɛwɛ bontam 126 yî bvudefɛ le. Yew yì defe fele yicii Aflika nu diɛwɛ bontam 293 le, ɛ yì fele yicii yî ɛkolɛ ke nshɛ le nu diɛwɛ bontam 830 le!"

Ɛ Katɛline ghay lɛ, "Abaay! Kfuu yiyɛ yéw ké no leeme we nɛɛ le?"

Ɛ Mishelle tfuse lɛ, "Yéw yì kumte ɛbulɛ le yicii nu ɛ bó bomte je miaaŋ. Mwɛɛm mvu n'yoo le mvunfɛɛm nu shiee le baay, bitfu bô kencaa.

Bó bomte biŋkente le biŋkente le. Bó ké yaw tum bitfu mum no biise kencaa yî dvú le. Bó taashi mwɛɛm mvu n'yoo le mvun, ɛ mvú no tɛmyi ntay keege lɛ yew nɛlo ece egɛn ncenjole."

Keebom yew yì kumte ɛbulɛ le nu ɛ bó kɛŋke keeyaw ecim kentuke kè looci shiile nɛn ntay fô kenffuy nu ke eleem.

Lɛŋlɛŋ no kete kè defe ké no kɛŋke gɛŋ yì faŋkɛn ɛ ley fokuse, nu kɛ no yew yì kumte ɛbulɛ le kɛŋke tɛn keekɛŋke kenffuy kè tɛmyi yî kembaan e. Kembaan kin nɛlo enu naa ɛkuse jo nshɛ.

Keegɛn fwe, ɛ bonyii bo kembom e seyse bitfu bi yew e. Bó ké tumyɛ bitfu bì dewkene keege no yew nu ke leem.

Bó tumyi bitfu nonɛn tu bó nulo ebom yew yì defe. Bitfu bin nulo etuu bvujitɛ a bvú duule baay.

Mvuŋgay mvu yiyɛ yew e nu yî bitfu le, kɛ lɛŋlɛŋ no bikufɛ nu yî ye wee le.

Bitfu bin nɛlo egvuse caan. Fì nu lɛ yew nɛlo eshiw ye caan (geenɛn ɛ fí tɛmyi keeyɛn).

Ɛ fwefwe wvù tɛmyi fey lo kɛnɛɛ ɛ shiw nshɛ, ɛ bitfu biɛ ege lɛ yew nɛlo shiw ye caan.

Bitfu ké no kɛŋke mvuŋgay ɛ ɛ̀ yaa nu mvù wɛɛ kɛ.

Fiɛɛ fimew fì shiee le fì kembom e nu kencaa. Kencaa kin nu monshɛɛm bô taan di bala le noo joo ɛ bó ɛ fiysɛn. Bó fiysɛn ɛ kí no nu bimkeke bô joo jó, ɛ bó mum no tfuuke ɛ̂ bikoŋ e ɛ bitfu nu jó.

Kencaa kedvu ké tawci mum tu diɛwɛ kembaan e, ɛ yew mum kɛŋkɛ bimbew bô fokuse fò bó lɛne yî dvú le.

Bó ké no bomte yew yì kumte ɛbulɛ le biŋkente le bene lo. Biŋkente bi ɛkuse kɛŋke keetuule bvujitɛ bvu baay. Ɛ̀ nu kfuu kencaa kiɛ kè nulo etuu bvubwɛ bvujitɛ, ege ɛ yew etɛmyi yaa shiike kɛ.

Kencaa kedvu nu ɛ bó ké gɛɛ ɛ̂ boŋkuw bò kɛŋke bitfu jó le, keegemgem bitfu fò joo bô fwefwe ekumte dvú. (Joo bô fwefwe gee ɛ ketfu duwse.)

Kin nu kefew kè bó ké kene boŋkuw bò tuule bonyii bene kaase booke dvú yew. Seke bó ɛ mɛse ɛ bom bô bitfu noo kencaa, mum leeshɛ bontoo, mum bise biwe bô bimbew mum mɛse fokuse fo yew.

Yew ké no shieele lɛ bó lese bokfuu bo ŋguy e noo bonsoŋ bo joo le bô bonsoŋ bò nyɛn efele jó.

Keemɛse, ɛ bó lese ŋguy bô dew fwese noo bibɛŋ keegɛɛle mwɛɛm yî dvú le, lese tɛn mwɛɛm mvumew mvù bó shieele keecee bô keelemte dvú yiyɛ yew e.

Ɛ Mishelle gay lɛ, "Mondvuum kaa wase bilaante le. Yéw yì dewkene joo bvudvuu kɛ caan. Me nu eŋke endioo enu wee kembom wvu baay, mbom yew yì defe fele yicii yî ɛkolɛ ke nshɛ le!"

You are free to download, copy, translate or adapt this story and use the illustrations as long as you attribute in the following way:

Bese cee yew yì kumte ɛbulɛ le

Author - Nina Orange, Ursula Nafula
Translation - Njah Alfred Njinyoh Nfon Protus Djin
Illustration - Kenneth Boyowa Okitikpi
Language - Nooni
Level - Read aloud