Ɛ̀ to nu kefew kemew e, ɛ biyuŋ bi bolemsɛ bomew e cee yew miaaŋ, gee fiɛɛ fibole fimwaaŋ.

Diuu dimew, ɛ mwɛɛm mvudieen mvubole ka. Ɛ bó mum shii nshii, ɛ wee mvu bife lɛ, "Mwɛɛm mvudieen nu enɛ fɛɛ?"

Mbife wvun to nu ɛ tɛme baay njefo kɛ bó to kɛŋke bigew kɛnɛɛ nsán ntɛw bó le kɛ.

Ɛ bó kpwawcɛ kɛ yî binlewtɛ bi kefew e caan, ɛ wee nɛ gay lɛ, "Bó egɛnè!" Ɛ wvumvu bife lɛ, "Fɛɛ?"

Ɛ wee mvu lɛ botɛte gay lɛ, "Keegɛn ecoŋ mwɛɛm mvudieen." Ɛ wee lɛ bonɛw bife lɛ, "Kɛ bó nu egɛn ekoo beene?" Ɛ wee lɛ botin tfuse lɛ, "Fo fifiɛ ejewsè wee kɛ!"

Ɛ bolemsɛ botin bodvu mum nɛ gɛn foway keecoŋ fiɛɛ edie.

Kaŋmwaaŋ no bó to kɛwɛɛ keecooŋke, ɛ bó mum koo bó.

Bó to nu ɛ jo bonyii bodvu, gɛn bô bó fô bonyii bo nci le.

No bó to nu fó, ɛ wee nci bife ɛ̂ bó lɛ, "Ɛ̀ be cu yɛɛ ntaŋ lɛ ben ecoŋ mwɛɛm mvudieen?"

Ɛ bolemsɛ bodvu kɛw no tfumtfume ɛbonɛbon. Ɛ bó mum nɛ see ɛ̂ nci no fí be kooyɛɛ.

Ɛ wee wvu fwe gay lɛ, "Me mbe ncu kɛ lɛ bó egɛne, ɛ ɛ̀ baa nu ɛkumɛ bvucoŋ kɛ." Ɛ wvu lɛ bofɛɛ gay lɛ, "Fí be ffumse me laa bó gɛne fɛɛ lɛ."

Ɛ wee wvu lɛ botɛte gay lɛ, "Bese bocii be ɛ bee keegom mwɛɛm mvudieen."

Ɛ wee lɛ bonɛw gay lɛ, "Me mbe ɛ ŋgay lɛ bese bocii eyɛnè, lɛ bó nu egɛn ekoo bese."

Ɛ wee wvu lɛ botin gay lo lɛ, "Bese bocii kee lo lɛ bese nu bocooŋ. Ɛ̀ nu fiɛɛ fì me mbe ŋgay lɛ fo fifiɛ ejewse wee kɛ."

Ɛ wee nci yekɛ nɛn, kiɛɛ lo lɛ bonyii bo botin bodvu bocii kɛŋke kebo fô bvucoŋ bvudvu le.

Ɛ wee nci mɛse lɛ, "Ɛ̀ nu fiɛɛ fì jee keegee mwɛɛm yî ŋkpwawcɛ le mwaaŋ, geenɛn fo enù bontaŋ bò befe kɛ!"