Ndenno, mawndu woni ndabbawa ɓurdunga semmbe. Dabbaaji fuu ɓurii hulugo mawndu ngam e ndu nanngaɗi, e ndu nyaamaɗi.

Ammaa fajiriire feere, mawndu e ɗaɓɓita ko ndu nyaamata, sey tuunol makeejo nanngindu.

Mawndu ubbi semmbee, ndu fooɗi, ndu fooɗi ngam ndu teetoo diga nanngorgol tuunol. Ammaa nde mawndu ɓeydi fooɗaago fuu, sey tuunol ngol ɓeyda ŋeerugo to koyngal maaru.

Mawndu nani nawɗum koyngal maaru ɓuri semmbe haa ndu somi, ndu ittii tammunde.

Sey nyalɗe ɗuɗɗe caali, naange fiyi ɓanndu mawndu. Ndu nani weelo e ɗonka, ammaa ndu walaa ceetotooɗo. Semmbe mawndu ɗustii naa' seɗɗa.

Haa ndu numi, "Mi maayay daliila weelo e ɗonka nder tuunol ngo'ol."

Fajiriire feere sey mawndu nani sonnyo nder baafe haade maaru. Ndu heɗiti nden ndu raari boɗɗum. Sey ndu yi'i gaduuru ladde bee iyaalu maaru e ɗi ngancida, e ɗi ngewta, e ɗi njala.

Gaduuji ɗin e dow laawol yahugo maayo ngam yarugo ndiyam, nden ɗi pijay nder loope heddeeko naange nyaaɗa.

Sey mawndu woyi wi'i, "Gaduuru! Gaduuru, useni wallam!" Mawndu tori, "Useni, yoofam diga tuunol ngo'ol."

Gaduuru jaabi, "Waanee maaɗa. An, a ndabbawa nga walaa enɗam. To mi yoofiima a nyaamayyam, min bee iyaalu am fuu, ngam ngewaa kooƴe."

Mawndu jaabi, "Mi hunanima mi waɗataa iri halleende nden, sam. Taa yoofiiyam en ngonay soobiraaji haa foroy."

Sey gaduuru nanani mawndu jurumɗum. Gaduuru wi'i, "Mi yiɗaa yi'ugoma bee nawɗum e ɗonka bana nii, nden weelo ɓadake warugoma."

Sey ndu fooɗi tuunol bee luwe maaru juutuɗe cemmbiɗɗe haa ndu teetini mawndu. Gaduuru seetake mawndu, soobaajo maaru keso."

Mawndu wi'i, "Useko, a seetakeyam. Jooni, mi hootay to iyaalu am. Naa yeeso." Gaduuru jaabi, "Hootu jam, soobaajo am."

Gaduuru e nana belɗum ngam jooni mawndu ɗum soobaajo maaru. Ndu numi, "Iyaalu am meetataa dogga mawndu."

Mawndu dilli, ammaa e ndu laƴa, semmbe maaru timmii. Mawndu e nana weelo waanee. Sey ndu yi'i ɓikkon gaduuru e pija nder loope.

Mawndu sey wi'i, "Hannde ɗum nyalaande saa'a am." Honnduko maaru e ɓula joode.

Mawndu sey noddi, "Gaduuru, soobaajo am keso, nanule. Balɗe ɗuɗɗe tuunol e jogiiyam, walaa ko mi nyaami. Jooni mi walaa semmbe ɗaɓɓutugo nyamdu. Foti kokkaayam ɓinngel maaɗa gootel, mi yewira kooƴe na?"

Ka hayɗini gaduuru. Ndu wi'i, "Mi seetakema diga tuunol nden jooni a yiɗi nyaamugo ɓikkoy am na?"

Mawndu jaabi, "Soobaajo am, yaafam. Mi wi'i non ngam e mi nana weelo waanee, haa mi laafi. Ammaa anndu, an, gaduuru, mi ɓuriima semmbe." Sey mawndu maɓɓiti honnduko maaru, ndu holli nyiiƴe maaru caatuɗe, cettiiɗe.


Mawndu ubbi semmbee ndu wi'i, "Taa hokkataayam gootel nder ɓikkoy maaɗa, mi hoosay ngel mi yiɗi bee hoore am."

Gaduuru e anndi ndu walaa pargal e semmbe bana mawndu. To haɓre waɗi, ndu waawataa ndu faddano ɓikkoy maaru.

Sey gaduuru jaɓi, wi'i, "Too, mi hokkete ɓinngel am gootel. Ammaa artuɗum e mi yiɗi, kollaayam no tuunol nanngirnoma. Ngam foti nyalnde feere mi wallay mawndu feere, mi seetotoondu diga iri tuunol ngol."

Mawndu e numa no kusel ɓinngel gaduuru weliri nder honnduko maaru. Ndu haaɓi ko ndu nyaama ɓii gaduuru.


Sey ndu so'iti, ndu watti koyngal maaru nder tuunol ngam hollugo soobaajo maaru no ndu nanngorino.

Mawndu ubbi, "Wayyoo!" ngam gaduuru haɓɓi tuunol, ngol nanngii koyngal mawndu.

Gaduuru wi'i, "Yowwaa! Mi nanngiima. A jooɗoto nder tuunol ngo'ol fahin, bee ɗonka e weelo fuu. Haa ndaaren ko nyiiƴe maaɗa cemmbiɗɗe e peɗeeli maaɗa cettiiɗi mbaawata wallirgoma jooni."

Daada ɓikkoy gaduuru hafani ngaduhoy, ndu wawli semmbee, "Ndoggee! Ndoggee! Ndoggee, ndaɗee!"

Ndu ɓeydi wi'ugo, "Ƴeftee bicce mooɗon to on ndogga ngam baaba mooɗon yi'a'on."

Ngaduhoy koy ndoggi nder baafe keerol semmbe maakoy fuu.

Mawndu e nana nawɗum ngam tuunol, haa e ndu woya. Sey ndu torii, "Gaduuru, useni wallam! Mi waɗante ko ngiɗɗaa fuu taa seetakeyam."

Ammaa gaduuru hooli, "Ka waɗataa sam ngam a fewiiyam! Mi meetataa hoolaagoma fahin haa foroy. Sey mi waggina dabbaaji luttuɗi, taa' ɗi teetinma ngam soynde goonga maaɗa."

Gaduuru yi'i ɓikkoy maaru, e koy tokkootiri, e koy ndoggida bee daada maakoy. Ngaduhoy ƴefti bicce maakoy ngam ndu yi'akoy. Ndu doggani iyaalu maaru, sey ɗi fuu ɗi ceeti ko'e maaji.

Haa hannde, gaduuji ladde, to e ɗi ndogga, sey ɗi ƴefta bicce maaji dow ngam yi'ugoɗi bee anndugo koo ɗume e jam.