Ɛ̂ kelaante kemew e nu ɛ wan kpwoon mvu to cee jó ɛ diee diew nu lɛ Ɛlla.

Wvú to defe lo, yiile ye le bô yvuw ɛ yí yiile tɛn. Wvú to kɛŋke ɛjisɛ ɛ yó semseme.

Ɛlla to kɛŋke bigew ɛmvu ɛ bí jee, baa nɛn bvuuu. Wvú to kɛŋke gee dì jee, nu wan kpwoon ɛ wvú lemte baay, yaa ké no nyaa naa lo ŋgɛw ɛ̂ bwee bô ice kɛ.

Fiɛɛ fimwaaŋ fì to ffumse bwee bô ice to nu kfuu mwɛɛm mvumew mvù to ké no gomte keekiɛɛ. Wvú to ké no biwci kfuu bombife bomew ɛ ɛ̀ yaa nu bó fɛn kɛ.

Kɛ diɛwɛ kenfɛwsɛn e nu ɛ kete ke ŋwaʼ le ke Ɛlla le to ŋgeyɛ, ɛ wvú bife ɛ̂ bwee lɛ, "Mama loo, kete kem ke ŋwaʼ le nu ɛ ben woŋ wvu we le le?"

Bwee bô ice to nɛn'yi dose lo kefew kemew e bô bombife bew bo nteen, faŋɛ yaa bvuu taale jó kɛ.

Geenɛn, ɛ ʼƐnly waa bwee Ɛlla wvù diemsɛn to ké nya bitem sekecii keeyeke bombife bew. Ɛ jaŋ ke no too ɛ wvú bife ɛ̂ waa bwee lɛ, "Jaŋ yì nu we ɛ̂ kembɛw e beele lo le?"

Ɛ waa bwee kiee nɛn, tfuse lɛ, "ʼAay," mum gɛn fwe keenɛle lɛ jaŋ ké no gbwee seke kekfu kè nu we ɛ lɛ wase le.

Ɛ ɛ̀ ke no nu diuu dimew ɛ Ɛlla yɛn lɛ wen nu ebuy egɛn ghancɛ. No wvú to ghanci, yɛn kete ke mvuntam e kemew e nɛ baytɛn ŋgoy tiɛw yî dvú le.

Ɛ wvú sɛsɛ lɛ, "O me looo! Kete kin shieele wee ɛfufɛ wvù fɛ kí." No wvu gayɛɛ non, keŋghaw ke fiɛɛ le, ɛ kete kedvu tfuse lɛ, "Kecɛɛy, me nshieele wee ɛfuwɛ."

Ɛ diuw yum Ɛlla ɛ wvú bife lɛ, "Wo ghan nɛɛ le ɛ sɛ no jemyi?" Ɛ kete kedvu tfuse lɛ, "Me nu kete kè nɛlo etfuse bombife buw bocii."

Ɛ Ɛlla kase bife lɛ, "Ɛ̀ ge la lɛ kɛ waa bwɛɛm wvù diemsɛn nɛlo eyuw no wo jemyi kɛ?" Ɛ kete kedvu tfuse lɛ, "Ɛ̀ nu njefo wvú baa bife wase fiɛɛ ɛ̂ me kɛ."

Ɛ Ɛlla lewtɛ gɛn fô waa bwee le, see ɛ̂ wvú fiɛɛ fì kooyi. Ɛ bó wvú bocii saa kenlewtɛ kase gɛn fô kete kiɛ le. Ɛ ʼƐnly bife ɛ̂ kete kedvu lɛ, "Wo nu dvú kecɛɛy e?"

Ɛ kí tfuse lɛ, "Me nu dvú kecɛɛy." Ɛ bô waa bwee no bine bine yuuke njoŋ.

Your translated text Ɛkɛw ɛbvubwɛ le, ɛ bó faŋɛ yaa bvuu jewsee bwee bó bô icee bó kɛ.

Naa seke la kè bó kɛŋke mbife, ɛ bó gɛn dvú fô Kete ke Bvufee le kiɛ le ɛ kí tfuse bombife bobole.