Biŋkaaŋ ké no cee dikfuu di mondvuum e. Bimew cee ntaashɛ le nteen, bimew ɛbinɛbin.

Kenfɛ kin nu ɛkumɛ Naeku bô Nasɛlian, jɛ́me ɛ ɛ̀ nu shéw ɛ yí cee woŋ wvù Kenya le, ɛkuɛku, keba ke ɛgay e.

Jɛ́me yin cee bô ŋgoo yi baay yi shéw kɛ diɛwɛ 80,000 e.

Ŋgoo yi baay yi shéw ké no cee ɛ̂ kulɛ le ɛ yí bom bô nshɛ. Kulɛ wvun nɛlo enu ɛkuse kɛnɛɛ ɛwe jo nshɛ kɛnɛɛ modvuum man e monciim.

Keba ke kulɛ le kè bó yɛne kí le ɛwe nu tume di shéw e. Ditume nteen ké no defe ɛwe jo nshɛ kɛ diɛwɛ bontam bofɛɛ gɛne buyte botin e.

Ɛ Naeku gay lɛ, "Bese nu bo kembom, kɛŋke bvufee bvudvu ntay!" Shéw ké no gee dilemme jɛɛy jɛɛy fô ŋgoo yicii le. Naeku bô Nasɛlian nu yì lemte lo. Shéw yì lemte yicii nu bokɛnɛ.

Shéw yì lemte ké bom kulɛ, no jiŋyi fó ntay. Ɛ Nasɛlian gay lɛ, "Bese bomte mondvuum mo baay baay ɛ ɛ̀ yaa nu mo wɛɛ kɛ."

Ɛ Naeku cu ntaŋ lɛ, "Beewo enɛle no beene bomte ɛla yo beene. Beene ké kɛw yaw cim bibuw bì ɛ̀ nu je ɛkuse jo nshɛ."

Ɛ Naeku sumtɛn lɛ, "Beene ké cim bô bijɛw bisɛɛbeene bi tɛmyi. Beene nɛlo ebvuse nshɛ nteen!"

Ɛ Nasɛlian gay lɛ, "Keege lɛ bimbew bi bibuw bisɛɛbeene le etɛmyi, ɛ beene baŋyɛ bô ncɛŋ yì nyiike noo nshɛ."

Ɛ Naeku bise lɛ, "Nshɛ yì nyiike yɛ ké yum, mum tu diɛwɛ nshɛ kelay e. Bokulɛ nɛlo enu dvú egɛn ebuy ncenjole."

Ɛ Nasɛlian gay lɛ, "Bese ké bvuse nshɛ yì bese cim, mum bom tume dvú ɛkfuŋ. Tume ké no nu kediɛŋci kɛnɛɛ diɛwɛ ŋkun e bô bibuw yî dvú le nteen."

Ɛ Naeku gay lɛ, "Ditume dimew nɛn'yi no defe ɛwe buyte bontam bvuukɛ!"

Shéw nu biŋkaaŋ bi kentaashɛ le, cee ŋgoo le nteen. Yí kɛŋke dilemme jɛɛy jɛɛy keebaancɛ kɛw ŋgoo yibo bô keeyɛn lɛ goo yidvu kuu lo.

Shéw yì lemte lo diɛwɛ Nasɛlian bô Naeku le ké cim mum bom kulɛ. Yì nu bosoogɛ ké no cɛyte kulɛ. Yì lemte, bô bosoogɛ ké buy ghan gom mondvuum mo monfɛm keeyoo fó.

Shéw yì nu bondɛ ké no taale fô Yaa le noo fô mvunlɛɛy e.

Kulɛ kɛŋke biba nteen. Kebuw ke Yaa le nu dvú, bô ke mvunlɛɛy e, noo fò bó gɛɛle mwɛɛm mvudieen. Bintuke bì nu diɛwɛ jé le taashi biba bidvu bicii.

Yaa nu shew yi baay fele yicii, nɛlo ece efey naa lo shéw yicii.

Ɛ Nasɛlian gɛn fwe gay lɛ, "Bese ké bom dintwemtwem kɛnɛɛ bonsoŋ ben buy ɛwe jo nshɛ wvu lɛ fwefwe wvù lɛɛtene eleyte gɛne ɛ̂ kulɛ le."

Ɛ Naeku bise lɛ, "Shéw ké no shieele fwefwe wvù lɛɛtene keenu dvú."

Ɛ Nasɛlian nɛle lɛ, "Dintwemtwem fici tɛn kulɛ ɛnte lɛ fo jó ke nɛ etonyi baay kɛ."

Ɛ Nasɛlian gay lɛ, "Bese kɛŋke mondvuum keelemte mwɛɛm fó, ɛ bese lemte mdoondose. Bese ké boŋcɛ tfuw yi bite bô mwɛɛm mvumew mvù bese yɛne kɛ lo, mum lem mdoondose dvú."

Ɛ Naeku sɛsɛ lɛ, "Yummm! Mdoondose mvun ké nyaŋe ŋgoo yin yicii. Ɛ̀ mɛy kɛ bese kfuu yin shéw yì ké no lemte mdoondose."

Ŋgoo yi shéw ké no kɛŋke Yaa bô Nfon wvubo. Shéw yì lemte ké no nyaŋyi kaase cɛyte bonyii bo baay baay ban.

Yaa ké ce buy kɛ diɛwɛ bilum 20 gɛne buyte 30 le. Wvú nɛlo etufe ɛge gɛne lo bomala le yî nshii we le. Mvunlɛɛy mvu shéw e mvù bó kay ɛ̂ ɛge le nu ɛ bondɛ ké no taale fó.

Ɛ Nasɛlian gay lɛ, "Shéw ké no nu ɛ yí ɛ looci ɛ seyse ŋgoo yibo ntay. Ŋgow yicii ké yɛn lɛ wen gee fiɛɛ fì nɛlo eficɛ ŋgoo yicii ɛ yí nu dvú bvuu kuu."

Ɛ Naeku bise lɛ, "Bese bocii nu ɛ wee kɛŋke diew lemme, gee dí. Shéw ké no lemte ntay yî kentaashɛ le. Ɛ Nasɛlian bee lɛ, "ʼƐɛ, beewo ekase etu keseen yî lemme le keecimte!"