Omîjanî aatî ꞌdaŋ hutto miji îyaŋ, ꞌTuduha.

Omîjanî buo fê isi jio okuat êêtûk honyi wîr-wîr.

Jio nôlôŋ lîa, îbûrî nyia eesuŋ amaji etinyaŋi hîrrê.

"Ifûhara eesuŋ hûnîa addi," ajio ꞌTuduha. Oŋiyie ajasi hoŋ.

"Iyye ôlô! Irribôrôî eesuŋ hûnîa addi tênîa," iwiwoŋita inyi.

Oŋiyiei aboŋojin hoŋ.

"Talî amônyê eesuŋ hûna?" Ayyotio inyi diyya.

"Oŋiyei êma hoŋ."

Olô nyiadî Ohûrê, eto linyia iyyahatio ꞌtô eesuŋ hûa, îmatûna aarî tô mosura. Ettê, eesuŋ honyi hûnîa îttadara amaji ênnê itinyiaŋierek êrrê.

Ninyia îtayîrû inyi ewiwoŋita ꞌTuduha, êttê îdîma ôllô osodottia buo abaŋ.

"Iko îmîja nêrrê hunne îhanî eesuŋ hûnîa ihuania!" Adulo ꞌTuduha ewiwoŋita.

"Abôrî isi atôbôk hoŋ ênnê îlaman ꞌtô."

Ojio gaa diyya, "Aah! Inyiak fê!" Itayîrûnî aatî inyi îkîana.

"Alô nî itisiahina êram anîa jio bolis. Ibuosoni eesuŋ hûnîa aŋahî hoŋ."

Attu atî buo Ohûrê tê îdîmî, iko allioto îhanî. Ahîhîsuno tôttô ihiji watî many igonyuniere inyi eesuŋ hosi.

Omîjanî eesuŋ hûnîa Ohûrê bêbê. Ninyia alô Ohûrê ajihosi, ayitoi eesuŋ hûa ꞌdaŋ êttê imijio jihonyi.

Jio amaji alîa, îfûtanî nyia êŋîŋîalak ꞌdaŋ hulla asaî ꞌtô alîawa, iko hûnna asaî ꞌtô aŋoruo iko aduri.

Amijie nyia isi ꞌdaŋ eesuŋ hunno oyitoi ꞌtô hûnîa ajio Ohûrê hama.

Gaa teyya, etterie eesuŋ hûnîa êkîana!

Itarriamahini nyia isi êkîana hosi êlûlûŋ, îtîpalie nyia isi aatî hûa.

Ittaragaŋaî nyia aatî ꞌdaŋ, êttê ihut êhalû ababô, ta abaŋî hosi eesuŋ hûnîa. Attatî eesuŋ hûnîa îdûahino, êttê îŋîŋîala aatî hunne îllîllîhaî ꞌtô hûnîa!

Attatî buo aatî îtayîrûnî ꞌTuduha îkîana jio, "Many tô berien ojiŋattaî eesuŋ îhîram pôcô hôhôî?"

Ara buo fê ônô eesuŋ anîa îtîpaliere ꞌTuduha!

Attatî aŋoruo hunne itinyiaŋie ꞌtô êrrê hosi ꞌdaŋ ihutonia îgêr ꞌTuduha ta abaŋî hosi.

Itîpalie eesuŋ aŋoruo hûnîa, omoritaî iko ajasio hunne itinyiaŋie isi.

"Nanyio jasio hûna? Ihuo hûnîa hunne îmaruahi buo fê oyohoji!"

Olêyô nyia ꞌdaŋ jio hubeŋi nyia eesuŋ hûnîa ottohuni êkîana!

Ayitoi eesuŋ hûnîa jio aboŋojin hunyia ôyîhanî diyya êttê iwowoŋita, "Ijio iyye ênya hôhôî aboŋojin hôî, hunani boŋojin? Ijio iyye hunno ôgûgûasaî ꞌtô hûna! ŋaî ôlô inyiaŋuna isi?"

Attatî eesuŋ hûnîa ifuatan jio ebotie itinyiaŋi, buo aatî fê êttê ittiforo isi imijiere.

"Ifûtî olohuduhudu itua hîma hataî. Ŋaî awak iŋiyo hûnîa! Eniŋ duo hôhôî jio alla ayiji ôŋîda hôhôî efuo îcôhûtta dini ga-ga-ga!" îkîanaî eesuŋ hûnîa buo ôsînyaî.

Ayitoi eesuŋ hûnîa attany atôbôk ꞌTuduha. "Buo iyye îyaŋ, ꞌTuduha, îtawaja ewiwoŋita hôhôî anîa. Obûaratie atobohin hôî hama, atî, hêrrôsôk hôhôî."

Tô hûnîa, ayitoi eesuŋ hûnîa êttê ifuatan, buo Ohûrê êttê îjîfana tê êhalû.