Tô berien, owon nyia ôbô agurre ônnô ôgêny iko eŋok êllê ibuyaŋa ꞌtô.

Oyyu nyia amanya agurre anîa îhaŋ ômûk aatî asamak. Amanya nyia eŋok ênnê ibuyaŋa ꞌtô anîa îlôfîrîhî buo fê oniamatio.

"Aŋaî idehini asamak hûnîa iyye îmanya itua-haji hosi?" Ifî neŋok êllê ibuyaŋa ꞌtô alîa agurre ênnê îlôfîôrô ꞌtô anîa ta ajôrê.

Itarraŋak agurre ênnê îlôfîôrô ꞌtô anîa, "Amanya nî iko aatî ta alibori hoŋ buo fê nî anûhatta eno hoŋ. Amala nî, mîaû, anna amôjô nî aŋiria."

"Ellê êhan nî ihuo nyia, Ofuoi ꞌtadî isi îŋatana anî amanya itua-haji?" Ifî eŋok alîa.

Itarraŋak agurre, "Aafê, îhana êrrê hunne êramak nî hûnîa jihoye, êttê isi îŋatana iyye. Ofuoi isi isiarana iyye aŋiria."

Ajio eŋok êllê ibuyaŋa ꞌtô alîa, "Abeŋ nî alô iriafuna iyye ahana."

"Apuany inyi ênêfûna nanî ahana. Abeŋ nî enyiak îwahan iruaŋanio iko inyi," ajio agurre, êttê îllûara pît.

Tô êsîŋa gurre anîa, itterio eŋok êllê ibuyaŋa ꞌtô alîa eguoho ônnô okuat bêbê îkat-haji.

Abahî amonyie haŋ inyi tê êtôî.

"Inyôb anî agurre anîa. Attu nî îhûanyia inyi alla arûmak nî inyi," îkîana eŋok êllê ibuyaŋa ꞌtô alîa buo iwiwoŋita.

Ninyia abala agurre illet tô haŋ hosi, êttê eŋok lîa înyûnûna inyi.

Attatî ijiaran, "Inyîôb nyia iyye anî. Iramak iyye anî jio ijiara anî eguaho îkat-haŋ. Abahî anî amonyie haŋ. Alô atî buo nî îhûanya iyye ihuania."

"Itayirie jihoŋ Iŋok, iremik adî bu iyye îhûanya nanî, atî ijiara nanî dô abalû ôbô kai. Ihuo ênnê edehittarî nî edie abalû kai habeŋ nî ahûanya inyi," Itarraŋak agurre ônnô ôgêny ꞌtô anîa.

Ifî eŋok, "Abala edie aŋaî?"

Itarraŋak agurre, "Edehi nî inyi kai, êttê nî ijiaran ijiara îhên many hunihoi. Hehenio edie ihuania, êttê nî înyônûna inyi."

Abûsak eŋok êllê ibuyaŋa ꞌtô alîa agurre anîa attatî ijiaran ijiara îhên many hunihoi. Iruat agurre ônnô ôgêny ꞌtô anîa êttê îdahîna îhîdê ꞌyani.

"Isuru tô hîdê ꞌyani ôŋîda îhên many hunihoi," abana eŋok anîa.

Itarraŋak agurre ônnô ôgêny ꞌtô anîa, "Itarie Iŋok, ibeŋ iyye înêfûna nanî inyiak. Abeŋ nî ebuyaŋa.

Iremik iyye ihenio many êsîha abotie, ebieni abotie kuyya buo fê ênyôŋ abotie, atî ibeŋ iyye înêfû nanî inyiak!"