Labotlhano mongwe o o kgethegileng rraagwe Yusuf o a apara pele ga lesedi le le phatsimang le phatsimisa loapi. O goga baki ya gagwe e e bokete e e kgonang go emelana le maemo a bosa le kepese e tala ya boboa e e bipang ditsebe tsa gagwe. O laelana le mosimane wa gagwe.

Matlho a ga Yusuf a phatsima fa Papa a re, "Gompieno ke letsatsi le ke tla tshwarang tlhapi ka lone ke bo ke go tlisetsa mpho kwa gae."

Tlhapi le mpho? Oh, e tla nna eng? Papa o fologela kwa Lebopong la Muizenberg ka baesekele. Tswiki tswiki maotwana a dira modumo go ya kwa sekhutlong sa basesi .

Di nonyane di dikologa loapi. "Eng? Eng? Eng?" di a lela. "O tla busetsa Yusuf eng?" Papa o letsa tshipi ya gagwe. "Ema pele o bone gore e tla nna eng!"

Batshwaraditlhapi ba lebile letsatsi le tlhaba. Ba tlhola matloa a bone. Ba tlhola digwele tsa bone. Ba reetsa phefo. Ba gogela mekoro ya bone kwa tlase mo metsing.

Rraagwemogolo wa ga Yusuf, Oupa Salie e ne e le motshwaraditlhapi wa treknet. Pele ga gagwe rraagwe, Oupagrootjie Ridwaan, le ene o ne a itse lewatle.

Mokoro o tsena mo makhubung. Matsogo a ga Papa a otologela go ya kwa sekepeng. Leoto la gagwe le tshegetsa letlhakore. Molala wa gagwe o a gagamala, mesifa ya gagwe ya mokwatla e a tlhotlhorega.

Papa o opela a ntse a bereka: "Latlhela le go tlhotlhora. Batla tlhapi. Goga le go tlhotlhora. O se ka wa ema."

Letsatsi lotlhe Yusuf o lebile loapi. Le phatsima e bile e phepa e bile ga le na phefo. Tlhapi le mpho! Papa o tla ka eng mo lapeng go tswa kwa lewatleng?

Ka dinako tse dingwe o tla ka kgapetla e ntle. Ka dinako tse dingwe o tla ka lebotlolo la leje le le letala le le tlhatswitsweng ke makhubu.

Malatsi mangwe rraagwe Yusuf o tla ka polelo. Fela jaaka nako ya fa ba ne ba fitlhela dikhudu tsa lewatle mo motlhabeng, makgolokgolo a ne a tlhatswiwa ke setsuatsue.

"Eng? Eng? Eng?" ga lela di nonyane. "O tla dira eng go thusa dikhudu?"

Papa a re, "Re bolokile dikhudu tseo, ke go bolelela ka tlhamalalo. Re di buseditse kwa lewatleng, nngwe le nngwe ya bofelo."

Nako tsotlhe Papa o tla ka pina. O opela pina fa a ntse a goga digwele. O opela pina a ntse a goga matloa. O opela pina fa a ntse a bofa dikgole.

O opela pina fa a ntse a tsamaya ka baesekele go ya lapeng. "Latlhela le go tlhotlhora. Batla tlhapi. Goga le go tlhotlhora. O se ka wa ema."

Nkoko Safiya o batla mogatla o mosetlha o o monate wa selalelo sa gagwe sa maitseboa. "Mme re tla nna lesego fa ba ka tshwara le fa e le lekakaie le le nnye. Go ka direga thata gore e nne Labotlhano wa mogatla wa tlhapi. Ga go na ditlhapi tse dintsi tse di setseng mo lewatleng," ga bua Nkoko a tshikinya tlhogo.

Yusuf o tshwara letsogo la nkokoagwe. Ba kgabaganya tsela kwa matlong a go tlhapa.

"Eng? Eng? Eng?" go lela dinonyane tse di ntseng mo marulelong a a phatsimang. "Ke eng sa selalelo?"

Ngwaga o fetileng batshwaraditlhapi ba ne ba lwa le batshameki ba makhubu. Ditlhabano tse di galefileng le mafoko a a goang.

"Eng? Eng? Eng?" ga lela dinonyane.

"Go na le lewatle le le lekaneng mongwe le mongwe," ga bua rraagwe Yusuf. A ba bontsha teseletso ya go tshwara ditlhapi e e neng e le ya ga malome Salie. "Makhubu a botlhe. Metsi mahala."

Nkoko Safiya o lebile ka dibonela kgakala tsa gagwe, menwana ya gagwe e sothegile ka ntlha ya go batla go itse. Segoagoe sa shaka sa lela.

Bathumi ba tabogela kwa morago kwa motlhabeng mme ba tshwara ditilo tsa bone. Batho ba ba tsamayang ka lewatle ba itlhaganelela kwa lotshitshing, ba tshotse diboto tsa bone ka fa tlase ga matsogo a bone. Ka fa tlase ga dishawara ba apola di wetsuit tsa bone.

"Eng? Eng? Eng?" go lela dinonyane. "Rraagwe Yusuf o tla tla ka eng go tswa kwa lewatleng?"

Rraagwe Yusuf le malome le bo ntsalae ba tsholetsa le go goga. Go tshwerwe shaka e nnye. E a sokologa le go thunya mo makhubung.

Rraagwe Yusuf o tlhatlhamolola matloa, a opelela shaka jaana: "Latlhela mme o tlhotlhore. Batla tlhapi. Goga o bo o tlhotlhore. O se ka wa ema."

Fa shaka e gololesegile kgabagare e boela mo makhubung, e tlogela mogatla o le mongwe fela o o serolwana o o mafura mo letloeng.Nkoko Safiya o tla itumela.

Banna ba gogela mokoro mo teng mme ba bofa megala. Khutlotharo e tshweu e e thata e tshwara monwana wa ga Papa.

"Eng? Eng? Eng?" go lela dinonyane. "O tliseditse Yusuf eng?"

Fa letsatsi le phirima, Papa o araba dinonyane. "Leino la shaka le le lesego la mosimane wa me." Ko lapeng Yusuf o tsholetsa mpho ya gagwe go fitlha kwa dinaleding.