Terna ca, ara ɗala ma ujek anta askwaw. Anta ca, a mpam ɓa uzəye mpe ege ŋ zam.

A pes vedəye ca, a wan a təwse, aya, gəmesl ege əy cempeɗ ege əy saraza mgba ata mpe ege leŋ ŋ vejeɗ.

A katawar ŋ vejeɗ leŋ a kegəre mpe mpe ege vedəye vedəye vəram.

A kedeŋza ŋ ha anta ca, a ŋgaya, "Mpe ŋghe ege əy kagayaka ete ŋghe mala bəse, aya."

Mbəy ŋtəɓal ata latawar, a təwse ca, a mpam laŋja, a jek dawan ata mpe teŋguleŋ, aya a wan anta.

Mpe anta ege əy kedepene pes ata ha leŋ vəgem ege əy kember mbga ata ha anta əy kala dəraf ege ma ata deɓ unaf ara.

A təwse ca, a lem lulak ŋkwaɓ wende.

"Mada sa bal mpe vedəye cekuɗe, sa lem səlay asa ra, aya, sa baw naka ŋ ɗala ma ujek anta ege vəram."

A nda ŋ uzam anta, a rakaha səkan ma ata zla mpe. A mar ŋ bazlata mpe ege ata hayak.

A təwse ca, gemesl a jene mbahw, a ŋgaya, "Mbahw, hwa bazlata mpe ege aza səkwaw. Ara ujek ŋcəne ey vəgem ege. Uzəye tata ege ca, ara uda ŋtakaw."

"Sa kaɗaw səlay ŋ lam ujek naka yam," ana Terna a ya.

"Ara mseɗ mada hwa bazl ujek səkan damaw ege ey vəgem ege aza vəram ŋ lam mala ŋkwa teŋguleŋ ŋkwa," ana gemesl a ya.

Terna a ŋga ŋkwaɓ. A nahza səkan ma ata zla mpe ka, aya, a səkaw gemesl ŋ ra anta ege.

Ŋgama anta gemesl, a ghwelzene werwer wende ŋ la dəres, a zla bəyrəyk, a zla hamas leŋ mpe maŋhwalaŋhwal ndar a ba guɗakw anta.

Ana ebe ŋghe əy nanja kaw vayay ujek anta aka.

Terna kalamza ma gəmesl aza. A kanda ŋ saraza gəmesl a wata anta. Gəmesl a pelzene ma ŋ mbal mpe ana a kaɗawaw leŋ a ŋgaɓa mpe maŋhwalaŋhwal ana ma unaf a kaɗawaw.

A təwse ca, əy kabaw tata a ŋgama mataŋtaŋ ege.