A nuna anta, hejəye vedəye tata jaɓan, ara gaɗan ege, əy la səkan ege tewtew ŋ la anta. A pes  wende, səkan tazam tata tuwaɗ.

A tewse ca, əy jav, aya, ɗala teŋguleŋ a ɗawzata, a ŋgaya, "Heje nelemaɓa səkan ŋ zam a katay?"

A tewse ca, lezen zlap ma kefkef ŋ laɗaw anta askwaw mavəday səlay ara ta askwaw leŋ ngama tata ŋ hayak anta askwaw.

A dewze walaŋ cekuɗe əy ulak ŋkwaɓ ca, ɗala teŋguleŋ a zlepetene a ŋgaya, "Mazakaw!" Wende a ɗuza a ŋgaya, "A katay?"

Heje ma mahkaɗ a zenetene a ŋgaya, "Ŋ ŋhelaha səkan tazam." Ma ŋfaɗ anta a ŋgaya, "Əy kana mbalaheje askwaw vaw?" Ma jaɓan a ŋgaya, "Hwa lalak mala wese səkwaw!"

Aya gaɗan ma jaɓan wese ege əy nah ma a luma ŋ ŋheleha səkan tazam.

Ma əy mar ŋ ŋhel ca, kəɗe ca, əy kambalata aza.

A tewse ca, əy jeɓzata gaɗan wese ege a ujek sawje ege.

Aya, sawje ege əy ɗawzata əy ŋgaya, "Ledeŋ ŋkwaɗ ma ata ŋhel səkan tazam a ndaha ka ara vayay?"

A tewse ca, əy mar ŋ sesekw ma ŋ taba tata. Aya əy ŋgeɗetene ŋ sawje ma ma anta a maraha.

Heje mampar a ŋgaya, "Sa zlepetene ca, nene nah ma səkwaw ca, nene nda ŋ ŋhelaha səkaw." Heje magbak a ŋgaya, "Sa ɗawzata, heje nda a vay."

Heje mamahkaɗ a ŋgaya, "Nene kajav ma ŋcene aza tewtew ŋ nda ŋ mpamaha səkan tazam."

Heje maŋfaɗ a ŋgaya, "Sa kazlapaheje sa ya əy
nambalaheje."

Aya, heje majaɓan a ŋgaya, "Heje kasan ha ŋtakaw tewtew ca, heje ŋhel ege. Amba sa zlapaheje sa ya heje ɗaw ŋ lalak mala wese səkwaw, a ya."

A dewze ma əy the zlap tata ege tewtew ca, sawje ege əy ŋgaya hejəye anta ege tewtew tata ŋhel ege.

Aya madakal sawje ege a zlepetene a ŋgaya, "Tuwah ca, hune ŋtez ledeŋ ŋkwaɓ ŋkune ege, cemey səy ledeŋ ŋkwaɓ ma kadak səkwaw ege!"