Madəyna ca, ara mba madakal ma a wata Karembe.

Əy nja ŋ uzam Bandəyagara.

A mackwahw wende aka, Madəyna a nda ŋ mpaka ma ujek.

A gəre ata haldəma ey mba mawal.

Marəyna kaghar anta ma a gəre uzəye gbak, tata mbəlakw ege.

A yaɓa cen, a ŋgaya, "Vana! Vana! Uzəye gbak əy a ma ujek."

Cen a hey kəcaŋ a ma ujek.

A ɗawzata, a ŋgaya, "Hune vayay? Hune ndaha ka a katay?"

Mba mawal a zenene, a ŋgaya, "Sa ca, sa Asama, mbe ca, ara zlana mepəzekw, zlam anta Yakawrawmaw."

Hwa sarzata ata Asama ey Yakawrawmaw ca, haŋga
əy ŋtəɓal, əy kalalakleŋ əy kasa gef.

Asama a kavas ŋ ghwalza, a ŋgaya, "Nene ndaha ka ŋ uzam Sawŋgaw, ata lajav uzam ege ma əy kayaɓa a Dukambaw."

Cen madəyna ca, kaghwaɗ anta mambaza, kaw kula ŋ zlap səkwaw.

Madəyna a ŋgaya, "Vana, yakzata əy madamaha. Əy ŋtəɓal leŋ metes a kajata. Əy kaɗaw heje cekzetene."

Yakawrawmaw a zlap yam, a ŋgaya, "Əy kahac uzam ŋcəne aza. Əy kajata mambaw nene ege aza. Səkan ŋcəne ege tewtew fətek."

A vas ŋ zlap zeney a ula mahartaŋ.

"A la wan gbak nene kanda. Nene kasan ata la ma nene kanda səkwaw, nene kasan səkan ma kanala səkwaw."

A təwse ca, cen Madəyna a lamzata uzəye wese ege a unaf ma taŋtaŋ.

A ŋgaya, "Hune damaha uzəye, ara ujek ŋkune. Heje nezenza ma anta, hune zazakɓa aza."

Uzəye wese əy zam uda mala mackwahw ŋ la anta a hejəye ma wata ege, ara uda kuhaw tata mampar ma əy kazamaw ŋ wan vəram.

Aya, Madəyna a cetene ma ŋ ata Asama ey Yakawrawmaw ŋ ujek tata.

Maraka a pes wese, ata Assama et Yakoromo əy kabaw tata ana hejəye ma a wata  ege.

Əy lawaɗ leŋ əy la zlan ma a wata ege zlaɓa uzəye vedəye.