Tô ôbô nôlôŋ, omuno nyia ôlôŋ bêbê êttê îhara alêtên ferioro buo fê obeŋ awak îddôrrô.

Iyaŋuno nyia anîa nêrram ônnô ôrrôhô ꞌtô nyio ayito nyia amanya tô faû.

Asô nyia nôlôŋ anîa ahôlôŋ ônnô omunorîk aatî ta atahas. Owotiaî nyia monyie iko honyie hôhôî, itoŋoi ômûk buo ômûk îwatîtaî.

Abalaî nyia aduri hunno ômûtarî ꞌtô iko hunno obolori ꞌtô îsûlûŋayô, îsûlûŋayô ôttô hûtûk ôwôrê, îmîyaŋ iko itua ôwôrê. oyirie nyia ômûk aperi hosi. Abalaî nyia ômûk akura. Omunoi nyia aatî ꞌdaŋ.

Inuohio nyia ôlôŋ afaû tô hîdê idou. Inuaha nyia inyi ta amuno nyio igonyu inyi aatî ꞌdaŋ abalaî ta amuno. Obeŋ nôbô narîŋ îtamuno inyi ihuo abala iko asuhotio duri.

Atî asôhînî nyia asahien jio amisihi hunno ômûk ꞌdaŋ ôlôtôrîaî. "Abeŋ nî awak aferioro ihuania," igigilo ôlôŋ, "êttê nî îttarrôhô abala watî." Obeŋ nyia ôlôŋ awak îsôhîna ahêttarrôhôjanî hîrrê. "Arasa nî dini," ajio ta afaŋan tua.

Alô nyia asaa îttûba ênnê îramattierek monyie iko honyie duri ŋarriok hosi jio ôŋîda ofuoi îhaŋ. Attuba nyia asaa ênnê îfûanyarîk aduri ôŋîda ofuoi îhaŋ. Alô nyia îsôhîna asaa ônnô oferioro, ênnê îharî aduri.

Obeŋ nyia ôlôŋ ihut. Adulo inyi jio amaji honyi loduo lîa. Toloŋi, ohodoritaî oloholio alla ara ôlôtôrîaî. Atî jio nôlôŋ lîa, obeŋi oloholio ohodori. Iha ôlôŋ alêtên ferioro.

Tô faû, hodulori nyia aduri abala, osuhotitaî, ôllûtaî buo fê isuttaî, allaŋ duo bu asaa ônô abala.

Aratan hosi amonyie iko honyie, ômîjîtaî nyia isi asahien hosi buo îlafuhoi. Ittaragaŋaî nyia isi. Ihanî ꞌtadî isi aŋaî? Itahûtanî asahien jio allaŋ asaa ônô abala, buo ôlôŋ harasa îsaa ônô bala!

Tô misihi Lotuho, ajiori nyia monyie iko honyie duri jio, "Duri ara bu asaa ônô aferioro." Buo aduri tênê ta asôhîna hosi aduri, êttê îtarraŋana, "Hafaŋ bu ôlôŋ ꞌtel-ꞌtel."

Amijie monyie iko honyie ahûattêk hosi. Attatî isi îmî ahîdê êttê îkûayata, "Ijiara êyarû aduri iferioro? Ara attarî bêbê, atî hara bu ôlôŋ akîl-fannî."

Asô nyia lûŋa akîkaî many itterierêk ayafa iko elelefi alêyô.

Attatî ayafa îhahayahîna jio ôlôŋ ta ajôrê jio, "ilo oferie ihuania. Ara onoŋ anîa asaa ihenyuniere."

Asar ayafa ôlôŋ, "Elle ibeŋ iyye ilo iferioro ihuania, êttê aduri îbîaŋan ifuatan iferiororo ꞌtulaŋ, buo fê aciaŋi, ayyani' iko amîyaŋ obeŋi ofuoi iferioro. Ettê nafaû iyyito."

Iha ôlôŋ êttê înnînnîŋ ahou honyi. "Imijie dini," ajio ôlôŋ, "Omunoi aduri anîa." "Awahî ijiara nanî etoŋo. Hawahî isi abala."

Itterio nyia ayafa aŋûŋûsîa. Ikîana jio ôlôŋ ta ajôrê. "Ilo oferie!" Ajio ayafa. "Abeŋ nî alô!." Ajio ôlôŋ.

Ajiŋak oyyami ônnô ôbôlô ꞌtô êram anîa. Igur oyyami ta ajôrê. "Ilo oferie, ilo oferie, ilo oferie." Buo ôlôŋ fê îha alêtên."

Ihan ꞌtadî ayafa aŋaî? Alô amanya iyyito tô faû.

Adulori nyia aciaŋi-harue aferioro, adulori nyia ayaburita hunne ibienie ꞌtô abênê hosi aŋa. Arasaî ariak hunno ojiŋuttaî ꞌtô ta attarî îdîmîta hosi.

Attatî ayafa îbana jio oyyami, "Hibe awôttô oluaha lûŋa nanî ôŋîda ôlôŋ iloyit egigilo honyi anîa."

Anîa, ikiem oyyami tô ôbô nêkôî honyi. Ikîana jio ôlôŋ ta anyalamî, "Hibe awôttô ilo oferie, Hôlôŋ, Odiha. Iniemuno adî bu iyye bêbê ta awulori hôî anîa many fê ꞌdaŋ tô noduo nyia?"

Ahût oyyami bêbê buo îkîana, "Ilo oferie, ihuania, Hôlôŋ." Abeŋ buo fê êkîana honyi anîa idehi ôlôŋ ôlô.

Igur oyyami bêbê ônnô okuat, many ohut attuduha. Ettê monyie iko honyie aduri, aciaŋi iko ahêny ifuhororo îdîmîta hosi.

Anîa, îlafuhoi monyie iko honyie duri, attati isi illilloŋo ŋarriok hosi jio ôŋîda isi ofuonni itua haji. Irrirriohuno nyia attarî. Aniemunei nyia aduri ꞌdaŋ. Buo ômûk îbûnyîtaî.

"Aŋaî atî êllê êfîlûhak ôlôŋ ôbô afure ettittoi?" Ihuo afure ana, ꞌTurui, ꞌTurui ŋarri hoŋ, ꞌTurui. Olô nôbô harî buo nôbô hêyêk (x2)." "Ijiara atî nanî akiem," ajio oyyami.

Anîa attatî inyi îfîlûk afure anîa dêê ênnê îlaman. Afure alîa ettittoi linyia îfîlûhatta hônyê jio oyyami hôsô inyi ahito. Attati ôlôŋ itterio êbûnyîta jio mêjûk.

Ibûnyîta nyia ôlôŋ bêbê. Attatî ikuahino îŋêrêf êttê îjôtôrô.

Attatî buo ayafa iko elelefi îlêyô. Aferiori nyia buo fê aciaŋi hunno oferietie ꞌtô ta attarî. Ibiononi ayaburita abênê hosi êttê iferioro. Ajiŋuni nyia buo fê aciaŋi harue tô masik îdîmîta hosi.

Ta alêtên hôlôŋ iferioro buo attarî îmaruak bêbê, êttê îjôtôrô nyia motie. Abeŋ ôhênyû berien ihuo ottoloŋi.

Ahahayahî ayafa jio ôlôŋ, "Ettê îhênyûna, Obuoyo. Abeŋ ôlôŋ îtayîrû inyi. Ifîlûk oyyami ônnô okuat buo ôlôŋ fê obeŋ ôhênyû."

Ara nyia baka amotie, buo afaû hodulo attarî. Ayito amanya tô faû.

Hoferiori nyia aciaŋi ꞌdaŋ tô faû. Buo fê abênê yaburita odulori ebiono.

Hoferiori aduri. Ta aferioro hosi ŋôl-ŋôlê buo attarî îmaruak, ibuoyoji ahûattêk hosi ꞌdaŋ ahênyûna ifuattarî iŋiyeri aŋiria.

Aduri hunyia ôhênyûnî ꞌtô, inyiahi îjôtôrô, igigiloi nyia isi jio hara attarî nyio hobeŋ ôlôŋ iduoŋ.

Ta abîaŋan hôlôŋ ôhênyû, abeŋi abênê yaburita aŋaî. Arasaî awotoroi iko edafiho îhasik hosi nyio hoferiori ayaburita.

Abeŋi ahêny amalaî ta ataŋatio motie. Toloŋi, ara duo ihuania akîl fannî, atî heriok nyia ꞌtir-ꞌtir ihuo attîŋ harue.

Itaŋalafie ayafa iko elelefi ôlôŋ woŋ-woŋ jio ôŋîda ôhênyû. Ibûnyîtaî nyia isi buo fê awahî iferioro, ta aduloro hosi amijio attarî ꞌdaŋ.

Ahût oyyami bêbê jio ôŋîda ôlôŋ ôhênyû. Akuati êmalîtî hêny. Aŋômôî aŋôhê. Amalaî agurrio. Ilohitaî ahohoroi.

Attatî buo ôlôŋ îtayîrûna ehosok anîa êttê îhênyûna buo îbônê!

Ta abîaŋan hôlôŋ îhênyûna berien, buo fê ta alêtên honyi iferioro buo attarî îmaruak, ayito nyia amanya tô faû.

Illiŋiaî nyia nêrrê iko êgêmîta watî ꞌdaŋ. Illiŋia nyia ahênyû honyie, monyie iko ŋarriok hosi. Illiŋia nyia afuatan monyie iko honyie îgêmîta hosi. Illiŋia nyia buo fê afuatan duri isukul.

Illiŋia nyia amala hêny. Illiŋia nyia êddarrata ibieyo. Illiŋia nyia buo fê aŋa bênê yaburita.

Abeŋi nyia aatî iko ôlôŋ ꞌdaŋ omunoi. Ibûnyîtaî nyia buo fê isi buo fê îttayataî. Ilôŋôjîtaî nyia aatî êram ônô ôlôŋ anîa.

Anyahînî nyia ariri ôlôŋ. Attatî îramana jio miji ꞌdaŋ jio jio abeŋ inyi enyiak îlêtên iferioro buo attarî îmaruak jio ꞌtûŋ.

"Alô nî iferietio alla attûba asaa ferioro, buo ahênyû alla attûba asaa ônô ahênyûna." Ajio ôlôŋ ênnê îmannaŋa ꞌtô anîa jio afaû ênnê îtayit inyi anîa amanya honyi.