Amanya nyia ôbô neto ana anya Imôlî jio nôbô abôrê gala.

Ohôdô nyia inyi, ôsô ôbô îmôlî, buo fê oofir honyi iriohi. Owon nyia buo fê inyi iko oŋite hunne îlamanî.

Owon nyia inyi iko aala hunno obuori ihuo asîhîra. Obi nyia atua honyi buo fê ara ahito ênnê îgîama ꞌtô bêbê. Obeŋ nyia inyi îhan ômûk nêrrê hunno ôrrôhôjî ꞌtô jio mônyê iko hônyê.

Ekukubo honyi nêrrê nyia isiarak ehawwa jio mônyê iko hônyê. Ifiyetio nyia inyi êfîîta hunno obeŋi aatî ifiyei motie-motie.

Ihuo, alla awuro apênsîl honyi, îfî Imôlî hônyê jio, "Iyaŋ, alô apênsîl hoŋ îhîdê idou?"

Ayyuhoi nyia mônyê iko hônyê êfîîta Imôlî hunno ôlûajî ꞌtô hûnîa many obeŋi inyiahi îtayirio jihonyi.

Atî, îtayîratio nyia illanyi, Obûrak, jio êfîîta Imôlî hûnîa motie-motie. Alla asayô fê ahîdê buo Imôlî êttê îfî, "Oyyoi atî eduhuo hutto îhîdê idou hûnîa?"

Asuhotio illa attatî îtarraŋana, "Obeŋ!" Ettê iduloro eramio inyi jio, asayô ahîdê êllê îlîhî edohuo bêbê.

Tô ôbô nôlôŋ, ababalarû Imôlî allet. Ninyia adaha inyi, igonyu nyia inyi ôbô ayyani ônô amak attatî inyi iwur atanaî honyi buo obeŋ igonyu.

"Ai, wululu! awak inyi Akim," Ajio Imôlî. Ta abîaŋan honyi ômîjak jio îkîanaî ayyani, îtarraŋak ayyani anîa. "Aafê, awak nî Akim."

Ilafuho nyia Imôlî êttê îfî, "Ikîana iyye aŋaî?" Itarraŋak ayyani anîa, "Nanî ayyani ônnô oremik ꞌtô îtarraŋana êfîîta hôî ꞌdaŋ."

Inyiak fê Imôlî îfî, "Nyio atî obeŋ eto-ꞌlê lîa îtayîrû iyye?" Itarraŋak ayyani anîa, "Obeŋ bu inyi îfî nanî."

Aŋêr Imôlî jio illanyi êttê îramana jihonyi asayo ꞌyani hua. Aŋeri isi ꞌdaŋ kûak jio ayyani nyia. Ifî Obûrak, "Ira iyye ayyani hôdê-hôdê?"

Itarraŋak ayyani nyia, "Ara nî ayyani hôdê-hôdê." Attatî isi ꞌdaŋ îhîa ta amuno.

Many fê tô hinyia nyia, abeŋi nyia isi inyiahi ittigemio monyosi iko honyosi.

Alla awon fê ôbô êfî jihosi, ofuoi fê jio ayyani mak nyia buo inyi fê êttê îtarraŋana êfîîta hosi.