Asaweere nde'e, Googo e suklano girbol baygooje. Kala nyalnde Asawe fuu Haasi, Hammed, bee Rukeyyatu e ngara fajiri ngam wallugo Googo maɓɓe bee kuuɗe ngesa haako. Hannde ɓiɓɓe mballay limugo e siryaago baygooje. Nden Bappa yaarayɗe luumo, mo adoyay kakaraaje baygooje, mo sooraɗe.

Moota jippini ɓiɓɓe ley kowaagol ngesa Googo. Sey ɓe ngi'i juugaare baygooje townde haade moota Bappa kiinga. Rukeyyatu e sappoo baygooje, mo hayɗini mo wi'i, ''Kaay! Baygooje ɗuuɗi waanee!'' Haasi jali wi'i, ''Baygooje ɗen ɗe kewtay ujuneere!'' Hammed yeddi, "Ɗe ngaɗataa! Ɗe ɓurataa teemeere ɗiɗi!''

Googo e dari haade yolnde e reeniɓe, sey mo wi'i, "On njaɓɓaama, mi nani belɗum yi'ugo'on!'' Ɓe kowniri.

Nden Googo wi'iɓe, ''Nanngee kuugal. Limee baygooje ɗen ngaatonɗe nder kakaraaje. Kala kakaraare fuu baygooje 12. E mi mari kakaraaje 20. Ɗiɗo nder mooɗon kebbinay kakaraaje 7 kala gooto fuu, nden gooto hebbina kakaraaje 6."

Ɓiɓɓe e ndari haade juugaare baygooje. E ɓe ngewta dow dabareeje feere-feere no ɓe limirta baygooje ɗen.

Rukeyyatu wi'i, "Mi numi mi limiray 2-2.'' Hammed wi'i, "Mi giɗɗo limirgo 4-4, ngam non ɓuri yaawugo.''

Haasi wi'i, ''Min, mi limiray 3-3, ngam mi yiɗi laawol am wona feere bee jey mooɗon!"

Neeɓaayi ɓiɓɓe kebbini kakaraaje 20. "Boɗɗum, on kuwi soosey!'' Googo wi'i. Sey mo sappi ko lutti, mo wi'i, ''Ndaa baygooje goɗɗe. Be'i am e ngiɗi baygooje, sey mi hokkaɗi ko lutti.''

Googo ƴami ɓiɓɓe, ''Baygooje noye ngaatuɗon nder kakaraaje? Baygooje noye lutti?"

Sey Googo wi'i Haasi bee Hammed mbinndana kala kakaraare fuu ceede no ɗum soorata baygooje ɗen. Nden ɓe mballa Bappa waatugo doŋle ɗen nder moota maako.

Sey ɓe cennda kakaraaje geɓe ɗiɗi potooje. Ɓe ndesa yeɓre woore wakeere nano, woore boo nyaamo ngam fotidingo tedduɗum doŋle ɗen.

Bappa wi'i, "Lutti seɗɗa en timmina kuuɗe. Ndaaree boɗɗum, kakaraaje noye ɓeydoton kala wakeere fuu ngam ɗe potida?''

Neeɓaayi ɓe nastidini kakaraaje 20 fuu nder moota. Bappa ummininga, mo nanngi laawol dillugo luumo.

Bappa waɗi numo, "To mi heɓi luumo baygooje ɗe'e fuu, mi heɓay ceede wo''ingo kowaagol be'i amin bee soodango ɓiɓɓe dokkal.''

E wuro maɓɓe, Googo bee ɓiɓɓe e cukli nder ngesa. Ɓe mooɓi haako bee geene nden ɓe njarna aawe. Ko njamndi sappo e ɗiɗi waɗa, ɓe fuu ɓe comi.

Googo wi'i ɓiɓɓe, ''Saa'i senndugo njooɓaari waɗi. On anndi ko mi hokkata'on hannde na?''

Mo nasti nder suudu ngam hoosugo ko mo siganiiɓe. Haasi, Hammed bee Rukeyyatu e ndeenamo, ɓe ngaɗi ka numugo dow ko Googo waddantaɓe.

Nde mo wanngi, ɓe ngi'i e mo saawi goɗɗum nder gude maako.

Googo ƴami, ''On keɓti ko mi siganii'on hannde na?'' Mo ƴefti wudere maako sey kaareeje ɗuɗɗe ndufi dow teebur.

Haasi jali wi'i, ''Mi heɓti! Diga nde nastuɗa suudu mi numii ɗum kaareeje!'' Googo wi'i ɓiɓɓe, ''On numti no ngaɗeten, koo? Cenndee bee aadilaaku. Taa' jey goɗɗo ɓura ɗuuɗugo koo famɗugo.''

Ɓiɓɓe puɗɗi bee limirgo kaareeje ɗen 2-2.

Ɓe limi: 2, 4, 6, 8, 10, 12, 14, 16, sey haareere woore lutti. To hawti fuu, kaareeje ɗen no ɗe 17.

Sey ɓe cenndi kaareeje hakkunde maɓɓe, moye fuu bee limngal kaareeje potudungal. Kaareeje 2 lutti.

Ɓiɓɓe ngaati kaareeje nder boorooje maɓɓe ngam ɓe kootida. Kaareeje noye kala ɓiɗɗo fuu heɓi?

Haasi wi'i, ''En taƴu kaareeje 2 cenndenɗe hakkunde meeɗen.''

"Pecce haareere noye gooto meeɗen fuu heɓata?" Rukeyyatu ƴami.

Hammed wi'i, ''E mi anndi,'' sey mo jali.

Saa'iire nden ɓe nani moota, Bappa warti diga luumo. Walaa ko lutti nder moota, Bappa e moosa e mo nana belɗum.

"Mi heɓii luumo, mi sooridi baygooje fuu! Jooni mi waaway wo''ingo kowaagol be'i, nden mi soodana'on bol ɗum on ngiɗi''.

Haasi, Hammed bee Rukeyyatu ndiwi bee seyo, ɓe ngetti Bappa maɓɓe.