Ior mba tse ken ayou anza kposo kposo. Mbagenev ka ve tsa ken ayou a i maa a u tsan gbem yô. Ior mbagenev di yô ka ve lu ken ayou a taver ga tsô maa vihin kera je.

Kwagh ngeren ne ngu sha kwagh u ya u lun a atumbe ker la.

Ya u atumbe ne ngu hen mnenga u ityough ki taregh ki Kenya, ken agar a Samburu. Angbianev mba kasev mban, Sidai man Naeku mba tse ken ityumbe imiom, mbamaren vev kua anngô ve u nomso u cuku di mba tse ken ityumbe i genegh.

Angbian u ter ve kua angbianev vev mba nomso mba vesen utar kua icombor ve mba tse ken atumbe a genegh.

Ibyua i hen icombor ne ngi ye toho hen ijiir imôm shi icombor ne ka i wasen ayolave. Mba tsan hen ijiir imôm gbem ga. Ka ve yem u keren ajiir a yan toho a he sha ci u ibyua ve.

Hen ningir u ya u lun a atumbe ne i kase igyar u asaar i yisa. Igyar ne ka i na ibyua u lun ken ya man ior mba i fe ve ga ken won.

"Ka se hii u maan ijiir ne sha u kohol ikyav mbi tomov hen kungur wase. Ka se sange agbar a ikyon u nderan mlu u ityumbe la," Sidai kaa nahan.

Naeku kaa er, "Se fa u kohol akaa a hen ningir wase maan uya asev. Hanma or u hen ya wase ka nan wase u maan imaagh."

"Ka se sange agbaa a vesen se hii wan sha u taver mlu u ukpekpe la. Se kange haav mbula mbu kôr ken kpekpe, a lu a ajiir a unden, a na yô indiran i you la cii i taver," Sidai pase nahan.

"Haav ka mbu tav ga, nahan i taver u ahumbe pulugh a mbu," Naeku shi seer nahan.

Sidai za hemen, "a lu iyou la i tilen sha yô, se wa ikyon i kiriki ken atô u i vesen la."
Naeku shi seer er, "ka se tume ihila se zer sha indiran i haav la. Ngun ka i yila er iyou i sanen."

"Iyou i sanen i dedoo ka i yange ura u nôôn man oo u tan ker." Sidai shi seer ôron.

Sidai shi seer kaan er, "haav mbu ayou a ase ka mbu lu delaa shin vingir."

Naeku kaa er, "iyou i kôngol ka tom u hemban doon un sha tom u ya u eren cii. Ka se nungwa angbiôr man akôngo a bua sha u kôngol iyou sha akaa a gbaaôndo. Se kura inya i kôngol iyou ne se côhô sha kpekpe, u cirin aan a a lu la. Ka a wase u yangen ahumbe a taver man inya u nyôron ken iyou."

Sidai za hemen, "Angbiôr a cirin sha kpekpe ka a kôngol shi a cir kpekpe zum u ka a uma yô. Ka se kôngol ken won u ukpekpe kpaa. Angbiôr a uman ka a taver shi a tsoughor."

Naeku seer nahan er, "Windoo mba sha ukpekpe mban ga, kpa ityumbe yase yô ngi a hunda."

"Kpekpe u kôngol ka a na mkunduiyol u ken atô iyough," Sidai kaa nahan. "Inja i 'mkunduiyol' ka nyi?" Naeku pine nahan.
"Kpekpe u i kôngol sha angbiôr man akôngo a bua yô ka a na iyough i kunduiyol ken atô zum u i tsee ken won yô. Sha ajiir a i ndôhôl yô, ukpekpe mban ka ve na mtsee u ken iyol sha u kôron mtsee u usu ken atô," angbian na na ikyar nahan.

"Hanmaor hen ityumbe ne ka nan wase u maan, shi se wase u numun i shie u ka se a moughun twev yô. Ka i lu ican u numun i shi hiden tôôn ikyav mbila maan i genegh ga.

"Ikyav mbi tomov yasegh yuhwa ga, ka i lu ican ga u zenden a mbi sha. Ka se tôô akaa a lun a inja la sha urakumi shin jaki hen ityumbe i tse se yem amin hen i he la. Inja er, haav nahan," Sidai seer nahan."

"Se fatyô u kohol ikyav mbi maan ya seer ken akôngo ase hen ijiir i he la," Naeku seer ôron.

"Ya wase kuma sha mlu wase, ka u zenden sha a ilev yasegh," Sidai kaa nahan.

"Inja i zendesha ne yô ka u se fatyô u zan makeranta hanma shie a ahuraior ase ga," Naeku kaa nahan.

"Makeranta wase ka u na se ian u ngohol ityakeda shi hiden a min, shi ka se nôngo u eren tom u makeranta," Sidai seer nahan.