Obeŋ nyia ahaŋ jio Ojasi. Odîa nyia inyi aŋahî tô tua mur aŋiria honyi.

Oferetio nyia inyi tô ômûk oŋitek itua mur buo amôlôŋô iko agorilaa omijie inyi tô hîdê ꞌyani iko tô tua ꞌtimottihien.

Iwat nyia inyi tôttô mur êttê igonyuna ayyaniꞌ arriaî.

"Orrôhôjarî bu hûna ayyaniꞌ dini asaî," igigilo inyi.

Hinyia aniemuno inyi tê êwatîta, êttê itoŋo îfaû, attatî icio jio ôbô ayyani abotie êttê îjôtôrô.

Itihuni abalîꞌ ꞌyaniꞌ inyi tô hôlôŋ buo ahêny îddarrataî tôttô hîdê buo amala hosi îlaman.

Awon Ojasi iko ôbô egigilo.

"Alla ayêfû nî ômûk ayyaniꞌ, aremik nî itinyaŋara ta anyahuo êttê nî îwanan iko asik amarat."

Alô Ojasi itua miji êttê îlêtên ihuruna aŋotit ꞌyaniꞌ. Itterio aŋotottia ayyaniꞌ îfaû.

Attana agorila jihonyi, "Hibe-awôttô, heŋutok ayyaniꞌ hûnîa îfaû. Araî isi ahaŋ jihôhôî iko ahêny. Osôhînî aŋahî ꞌyanniꞌ jihôhôî aŋiria."

"Awak nî anyahuo iduhuniere onoŋ aaji," Ajio Ojasi.

"Osô anîa aluo êllê îtattur iyye ahaŋitek aciaŋi arriaî iko ahêny iduhuniere aaji hôî," ajio agorila. Aliahi Ojasi. Attatî irruoŋonia eŋotik ꞌyaniꞌ îfaû, êttê ittoŋoni iko gorila.

Ajio illanyi gorila jio, oremik Ojasi îhûhûmûna amatafalî tô hifuoto buo fê ôŋêrû ejuti iko êyyêk hunna ayêî ꞌtô iduhuniere aaji honyi.

Ellê îhan Ojasi ihuo nyia, êttê isi ꞌdaŋ îwanan ika ahaŋitek.

Iruk Ojasi. Adahio nyia inyi jio gorila ga-ga-ga. Idehi gorila inyi ôdîûtta aŋahî arriaî buo fê îdûhûtta êyêk hunna ayêî ꞌtô ihuo awak inyi.

Asôhînî nyia isi alôrrîahat hullo oyiji ꞌtô bêbê.