Madina ni mwana wa waka mubaa kwa familia ya Karembe.

Ihi familia yakaia kifumbu cha Bandiagara.

Ituku jimu luma lwakenyi Madina odeenda rugha mnyango.

Ukawona mwana wa waka na wa womi.

Madina odeshinika nandighi kuwona awo wana wawi usewiichi.

Ukamuwanga ndee, "Apa! Apa! Koka na wana wawi aha mnyangonyi."

Ndee ukadhudhugha cha mnyangonyi.

Uenda wiwona awa wana ukawikotia, "Inyo ni weke ani? Na mwafuma hao?"

Wawomi ukatumbulia ukaghora, "Imi nawangwa Assama, na uhu ni mwanidu mtini, Yakôrômo."

Assama na Yakôrômo wedeka wachoka loliloli, wedeka na wowa na hata ndeweine sere.

Assama ukaendelea kughora, "Dafuma kifumbu chiwangwaa Songho, kwa kata ya mashambenyi iwangwagha Doucombo."

Uhu mghosi odeshinika hata ukasowa jeghora.

Madina ukaghora, "Apa, diwingire nyumbenyi, wachoka nandighi na sena wazughwa. Wawehitaji wutesia ghodu."

Yakôrômo kwa mara ya imbiri ukadeda.

"Kifumbu cha mzedu chevamilwa. Wavi wedu widefwa na dikalaghasha kila kilambo."

Ukaendelia kughora na lwaka lwa ndonyi.

"Dedeka dikienda na maghu kwa matuku mengi. Disemanyagha diende hao angu dibonye wada."

Kwa mikonu rose iwi, apa ukakaba awa wana kifua.

"Ingienyi nyumbeni, aha ni kenyu. Dichadeda kuhusu agha malagho iji mwahoresha."

Awa wana wikawadana na ihi familia kuja posho ya lumalwakenyi, vindo va imbiri va modo visewonie kafwani.

Baada ya kuja, Madina ukawienja Assama na Yakôrômo andu wilala.

Kufuma ijo ituku Assama na Yakôrômo wedewuya wana wa familia ya Karembe.

Widasarigha na kubonya kazi rose ra nyumbeni na wambao.