Osô Ihie ahito-ŋôttê ahouti tô haŋ Okanyi.

Amanyai isi Juba.

Tô ôbô ôtôrîaî, Alô Ihie ihianana êkat-haji.

Attatî inyi igonyuna eto-ŋôttê iko eto-ꞌlê.

Illîllîha nyia Ihie egonyuna honyi aduri atêrêjôk hûnîa arrîhaî.

Ettê iloŋ mônyê, "Monyoŋ! Monyoŋ! Owoni aduri arrîhaî îkat-haji dini."

Aŋeru mônyê îkat-haji.

Hinyia igonyu mônyê aduri hûnîa, êttê îfî isi, "Baŋaî îtaî? Efuanna îtaî taî?"

Ajio alla ara ꞌtô ahito-ꞌlê, "Anî Oke, haniyoŋ ana ônnô odiha ꞌtô, afure honyi Itteŋ."

Oleyei nyia Oke iko Itteŋ hunno oniemunie, abaŋî buo fê obeŋi omunoi.

Adolo Oke êramio, "Efuonni hôhôî tô miji Laŋabu, amiji ônô amisihi Lirya payam.

Ilafuho nyia monyoŋ many ôdûahino jio sîk.

Ajio Ihie, "Monyoŋ, ijiara isi ofuonni itua-haji. Aniemunie isi bêbê buo fê oniamaî. Awahî isi aluahio hôhôî."

Ikîana Itteŋ êttêrî îkîana honyi.

"Ofuonni nyia amîôrôk imiji hôhôî. Attohori isi monyoŋ iko honyoŋ. Abeŋi êrrê hôhôî ꞌdaŋ."

Adulo Itteŋ êkîana buo ahahaya îhahaya.

"Etuk hôhôî oŋitek arriaî îhîkôî. Ebeŋ hôhôî êmîjak efuo hôhôî ajia buo fê hôhôî ebeŋ êmîjak êhan ꞌtadî hôhôî aŋaî."

Ojio teyya, attatî mônyê Ihie îfôwûna aduri hûnîa ta ahas honyi.

"Ifuanna itua-haji, duri, ahaŋ hataî ana. Efuonni adî îyaba êllê îyîrîata îtaî," ajio mônyê Ihie.

Aŋiyei aduri hûnîa aŋiria ôttô ôtôrîaî iko ŋarriok Okanyi, êttêrî ŋiria jio oŋitek hunna alaŋî ꞌtô.

Ninyia atuhi isi aŋiyo, êttê Ihie îyarû isi iferiti hosi.

Many jio ôlôŋ lîa, asôhînî Oke iko Itteŋ ihuo ŋarriok Okanyi.

Abalaî nyia isi buo fê îgîamaî êgêmîta hutta haŋ ꞌdaŋ arabotie iko aduri hunno ômûk.