Ngise tsô ijen gba tser tar cii. Lu ugugôô tseegh ve lu a kwaghyan ye. Hanma pepe yô ve púrúgh ve yem ica a pe tur via ken icílé hen àtô u zege ifi yô.

Vé púrúgh vé hide á min sha à ci vé man icombor ve kpaa. Kpereketange un à nenge á àtam a tur nahan, à nôngu u wuan iyol. Un á kar han man un á zua à tam á tur ne?

A er mhen. Á vár tsur shin ikum na. Tsô á tôô tsuwa u inyaa a za kohol ugugôô. Á pine ve ér, "Ne rumun u wasen Mo je kpaa o? Kwagh gba'm à aka'usu, usu wam pir."

Mba ngur yemen u za dughun usu yô, kpereketange shiligh yav sha zege tyam tur la je. Ki veregh un shin ikyum. A sugh ugugôô mbala kpishi man yem ken ya na, za ya ityamegh ki tur ki la ken mkpeyol.

Kpa ityamegh ki tur imiom ki la kuma un ga. Á hide á za sha kwa had á kimbir iin ityamegh ki genegh. Hidi ze sha kwa tar yô, kwagh shon hii u nzuur ugugôô. Vé pine un ér, "Èr nan vé u zer van heen u va dughun aka a usu gbeme?"

Kpereketange kaa ér, "Hanma shie, ka me a za nyôr á mi je u pir." Ugugôô kaa ér, "Ka aie! U soo iin se kwaghyan!" "Ka mimi ga!" Kpereketange tuna. Á gber kwelegh á gba vaan.

Mhôônum kõr ugugôô á na. Kpernan tughtugh dindee nahan, hanmô gugôô na un ngur môm. Á purugh ve á ve nongo ve za ar hen itine tur i hen àtô u zege ifi la. Nengen á atamakyon a kpongum yô, Kpereketange soo ér saa un tswen un a zôr a ye.

Or gugôô nan a zaan wegh u zôron ityamegh ki tur nahan, kpereketange ngor, "Ka ki yagh! Ka ki yagh! M vande nengen á min!" Er nahan zanzan kula atamaikyon la cica. Ugugôô zua á ityamegh imiôm kpaa ga.

Ugugôô purugh wundu un tswen, áôndôimegh hii u haan. Á kaa á iyol na ér, "Aluer m er kwagh fefa ga yô, me saa sha kon tur ne. De mo kpa m tsuwe m yem sha ahumbe er ugugôô ve ér nahan."

Á shir ishima keeng, á tsuwe, maa gba TIING! Man á gba shin mnger, hen átô u mbaambe jighjigh.

"Ka di nyi na i va gbe heen ne?" Tse ambe ne tenger imio. "Ka anjen inyam u nyohon ne."

"Kpei, m zamber cuucuu," Kpereketange gba zamber. Á hii mlyam. "M ngu nongo wen, ne fam ga zee? Iyange m yem shir zum u ùter enev mbatsev la je kpa kwagh gba ne u keren mo ityô ga. Ne mba angbyanev av mba hiihii mba m hii zuan a mi yô!" Á vaa kpishi tsô mhôônom kôr mbaambe.

Tse ambe u tamen la kaa ér, "Se rumun ér u ngu nongo wase aluer u kunde shi u ya iue ambyôr er ka se kunde se ya nahan yô" Tsô ve na un tsuwa man ihyúndu mnger."

Kpereketange kaa er, "Ka pe ngôm u tamen yange á kunde voogh je ne!" Kpa á time ihyungwa hen inya sha ikyishinguha, shi a tume ihyônguha shin ityô tsuwaa. Á er inja er ngu man iue la nahan, kpa hanma kwagh cii kua nyôr shin ihyungwa i á time shin ikyishinguha la.

"Kwagh nyoho yô!" A ndiar zwa, a gema tsuwa gbilin á na mbaambe. "Hegen yô se fa er u lu nongo wase yô," mbaambe kaa nahan.

Vé rumun ér á tsa shin zwa ve a vé. "Kper pepe tughtugh me ôr ne mlu u uma wam cii," Kpereketange tôndo zwa nahan man ve cii ve gba mnyam.

Kpernan sha usé waang waang nahan, Kpereketange nder ambe môm ken mbaambe mbala, a kaa á na ér, "M soo u za hiden á kwase wam man mbayev av cii, sha er vé kpaa vé á wasem u ôrun ne kwagh u mlu wase yô. U fatyô u wasen mo peren cii mbaambe mbagenev mbala vé á nder je?"

Ishima doo ambe la ga. Á soo ér or á nder un pepe pepe nahan ga. Kpa Kpereketange zamber á na ér, "We à rumun yô wase'm! We u fatyô u ôôn mngerem man fefa á Mo!"

Ambe man rumun, man Kpereketange unde ambe sha ijime per kpe u ifi yande la. Kpereketange hungwa fele, á kaa á ambe ér. "M ngu ngôôr ga! Keghen mo, de ze ma'pe ga!" Kpereketange man tume ken toho yem.

Ka kwagh la, zanzan hegen, ambe ka á tar ashe sha zar'mnger kpôtôô a gôgô ishôngozwa á keghen Kpereketange ye!