Amanyaî aatî arriaî îhasik hunno ôlûfajî eduhiti hosi. Amanyaî ômûk îhasik hutto îhîdê idou buo ômûk amanyaî îfaû.

Oremehini asik hunno ohodori ꞌtô îwanan iko ahaŋitek arriaî itua hosi hunne îddêlîaî.

Araî Isaî iko Illuho ahaniyarak. Ilîaha Isaî atuhonia asukul-êttê-ihiji. Owon Illuho icuŋi hîŋa sukul-êttêrî.

Amanyaî aniyarak hûnîa iko honyosi, monyosi ojio hahanyi hosi, îhajî amara ôttô Juba. Omunoi isi amanya îhîdê haji ênnê illomohi ꞌtô Juba, ihuo ahêny hunna amanyaî ꞌtô iyyani ônnô ôhôdô ꞌtô.

Amanyaî isi îhaŋ ônnô owon ꞌtô îddêllêî amara 22. Akafaraî isi îhaŋ hosi diyya tê ekodi-makana.

Ihîanatio Illuho êddêllêtîa amara alla afuoi isi ahîdê iko alla asuuni isi afaû. Awak inyi îsôhîna ahayironi ꞌtîara moi. Awak Isaî îsôhîna ahaduhoni hasik ôŋîda inyi attû iduho amarat.

Ifî Illuho, "Osô amara hôhôî ana êhôdô marat ꞌdaŋ ta Afrika?"

Itarraŋak Isaî, "Obeŋ, ôsô ahodori amara ana ihuo amîtîrî 126. Allaŋ amara ônnô ôhôdô ꞌtô ta Afrika ꞌdaŋ amîtîrî 393 kai. Amara ônnô ôhôdô ꞌtô ta faû ꞌdaŋ ôsô ihuo amîtîrî 830!"

"ꞌtattattat! Odulori asik hûnîa awotia aŋaî?" akûaya Illuho.

"Ta ahôdê-hôdê hîram, orriamarî aduho amarat. Abîlata iko asemetti hunna awahî bêbê eduhiti.

Oduhi amara tê êddêllêhîna afaû-haji abotie jio ebotie, itterie ta amarrut bîlat êttê itilioronia asemetti igeri marrut. Ogoli eduhiti hûnîa bêbê alla attûbanî isi arrîhaî buo fê êttê iduloro many fur," Itarraŋak Isaî.

Alla aduhoi amara, ôbôhî aduhok ewure ônnô owudo ꞌtô dô ônnô ofuoi îtawoniere afaû-haji.

Ihuo anna awattarî ayyani ônnô ôhôdô ꞌtô iko addê hunno irosiji ꞌtô, hunno ôrrîômôk inyi attua faû, awak ijiara amara owon iko êtawoni ônnô ôgôl ꞌtô ênnê îddêlîa imoruo. Tô ôbô oremik amoruo anîa îwanan itua faû bêbê.

Ennê îjîfak ꞌtô, îhûhûmanî aduhok amarrut haji. Oduhi isi amarrut anîa ta abîlat hunno ohodori ꞌtô.

Amarut bîlata anîa itidehi aduho haji ônnô ôhôdô ꞌtô ahîdê. Owoju abîlata êrrê hunno odiŋi ꞌtô arriaî.

Osô amarrut bîlata bêbê tô haji, ôsô ihuo atorowwok tulo.

Obeŋ abîlata owuro alla akudi. Iramak anîa jio oremik aaji îttannîŋa kai (atî ebeŋ eremik igonyuna).

Alla ahût oyyami bêbê, kuyya buo fê alla awon okitik, Idehini abîlat hûnîa aaji îttannîŋa kai.

Osô abîlata êtagoli ônnô oremik ikudo buo obeŋ owuro.

Ebotie iduhit ônnô ôsô ꞌtô bêbê inyi abolie-semetti. Iharruahini asûlûŋayô, asemetti iko aarî îhûhûmûniere abolie-semetti. Iŋôlî aduhok abolie-semetti anîa many îfîrarî, attatî buo ijuhonia igeri marrut bîlak.

Alla ayôhô abolie-semetti, êttê îgôlôn, ihuo amoruo. Inyi ênnê îhûhûmûnierek afaû haji iko olohitir.

Oduhoi aduhok amara ahîdê, îtîjîfanî êddêllêî abotie jio ebotie. Ijiara êddêllêtia hunne îlîahaî ꞌtô îfaû ogoli.

Abolie-semetti itihok abîlat marrut, ôŋîda aarî iko oyyami obeŋi ottiri abîlat. (Aarî iko oyyami idehini abîlata îlôgîrîwôj.)

Oduhoni buo fê apît ônô ekodi-makana jio alôŋ alîa. Ellê îtawonihini êtabêk ônô abîlat iko abolie-semetti, êttê aduhok îhûhûmana eluŋurita haji. Attatî isi îfônîhîna ahîdê hasik iko olohitiri hosi, attatî buo ituhonia afaû-hasik

Awak aaji anîa asillihi hîma iko eŋeriti harî hunno olibori ꞌtô iko hunne îbôtî ꞌtô.

Icuŋi, irietuni aduhok êêma, îhûhûmanî êkat-hasik, amociere, nêrrê êmanyîtî iko êgêmîta itua amara.

Ajio Isaî, "Olûajî aborejin-gala hunno obolori ꞌtô, buo afaû ôlô îŋaramahîna jihosi. Irîsanî asik hunno ohodori ꞌtô afaŋan maji ôttô hîdê. Alla attu nî iduho asik, attu nî iluak aduho ônô êhôdô amara ꞌdaŋ tô faû!"