Amanyaî aatî îhaŋitek arriaî hunno ôlûfajî eduhiti hosi. Oduhi ômûk tê eduhiti hutto hidiofo, ihuo ejuti. Oduhi ômûk tô nêrrê hunne îhûmûnî aatî, ihuo akarajaja iko asemetti.

Oduhi ômûk tê eduhuti hunne îyaŋunie tô hidiofo iko hunne îhûmûnî, ihuo aaji hujuti anna ara ohitir honyi amatafalî ôttônô êyaba ana.

Amanyaî Ohiri iko Tômê Ifuotu payam, îgêr miji Gunyoro. Amanyaî isi îhaji hujuti iko mônyê buo hônyê.

"Ara aaji hujuti eduhit Lotuho ênnê ilur ohitir honyi kûd buo fê ofio tê ejuti. Oduhi asik hunno ôsôhînî ꞌtô ihuo hûnîa arriaî imisihi Afrika hutto iduoŋi hôlôŋ," îramak Ohiri.

Itahasû Tômê êkîana, "Olûaji asik hujuti hunne iluri olohitiri hosi êhîtaî, buo fê owoni iko êkat iko eluŋurita. Itihoni eluŋurita hûnîa ta akarajajaa, arîŋ ninyia obeŋi ꞌtô jio monyie hôhôî."

"Oduhie nyia hohonyiok hôhôî aaji hujuti ana Lotuhoi. Ofônîk monyoŋ ômûk eduhiti gala diyya," ajio Ohiri.

"Ijiara hôhôî êramak îtaî oduhoi aŋaî," ajio Ohiri.

Ojio inyi, "Oduhoi aduhok ta abaûhien, ejuti, amorui, asûlûŋayô iko asemetti.

Obôhî isi afaû dô. Itûfûtanî isi diyya moruoi hullo ômûtarî ꞌtô, efuoto, iko asûlûŋayô. Itagôl anîa etawoni haji ônnô ofuoi iduhoniere aaji."

Adulo Ohiri êkîana, "Asiehini aduhok hulia alala tê êgêr îtawoni haji. Ettê îfîtana alala hûnîa îlôhêtêr, asô anîa amarrut ônnô ofuoi iyyehiniere olohitir.

Alla atuho êtawonio haji, êttê aduhok hulia iyyehina amoruoi hunne îfûdaî itua marrut."

"Teyya, êttê aduhok iharruahina efuoto, aarî, iko awôttô. Ogôl efuoto wôttô ihuo asemetti alla ayôhô. Oduanyani isi efuoto wôttô anîa ilohitir ôŋîda înîafak amoruoi hûnîa îmaji abotie." ajio Ohiri.

"Alla aduhi aaji ta amoruoi iko efuoto wôttô, êttê olohitir îgôlôn buo fê êttê iduloro many fuur." afônîk Ohiri.

Ojio Ohiri, "Ilîk aaji ênnê irosi olohitir honyi buo fê ônûk."

Iramio Tômê, "Iramak anîa jio, îlîk itua haji alla anôk ôlôŋ. Obeŋ ôlôŋ ojiŋak itua haji tôttô ohitir."

"Jio amisihi hunne îlîhî ꞌtô ta ameyu, îtanôk olohitir anîa atua haji tê etihonia honyi anahan itua haji."

"Ihûhûmûnî aduhok hulia afaû haji hôhôî tê esihinia hosi efuoto îtawoni faû haji," ajio Tômê.

Ajio Ohiri, "Ituhoniere afaû haji, inyiahi isi îyîyaranî efuoto îhîdê êttê isik. Itagôl anîa afaû haji alla ayôhô êttê afaû haji irrijioro."

Ajio Tômê, "Icuŋ êgîama ônô aaji alla afihini ejuti îhîdê haji. Illihi ahîdê hasik hujuti êcûbûta tô sihidi.

Itabehi aduhok ahîdê haji ta ahuro (êyêk) hunne itibuoŋoni oosi hosi tô sihidi. Attatî isi ifihina ejuti îyîyana hunne îddêllîaî. Obeŋ ahîdê ottulok aaji ônnô ofio ꞌtô."

Oyyu ejuti bêbê alla afihini îhîdê haji. Atî, ara buo fê ejuti ahaŋ jio aciaŋi ariak iko hunno ômûk. Ittarrahojie arriaî hosi êrrê.

Imîja arrijorita hûnîa ôŋîda îhêrû: agagarî hunihoi, etoni, êŋênyû, aŋarama iko edie?

Omunoi agagarî amanya iduhiti hunne îyaŋunie tô hidiofo ihuo ejuti, buo fê ôlîhaî diyya.

Obeŋi agagarî îttarohojie ejuti buo fê isi ottohie ariak hunno ômûk.

Awak eherio ejuti ôttô hîdê haji ôŋîda êttarrôhôjak hîrrê ihuo ekuaŋi, olofudee iko aŋarama obeŋi ojiŋani diyya.

"Elûaja hôhôî ômûk hulle êmanya ꞌtô itua haji hujuti!" ajio Tômê, buo omijio ahîdê haji. Abaŋ inyi agagarî.

"Ematta nî hunani ciaŋi hunna amanyaî ꞌtô ihaji hôhôî dini?" îfî Ohiri, buo abaŋ.

"Alla attu nî iduho aaji hoŋ, aduhu nî aaji hujuti ônnô oduhi ta attêgûla!" asuhot Ohiri.