Amanyaî aatî îhaŋitek arriaî hunno ôlûfajî eduhiti hosi. Amanyaî ômûk îhaŋitek hunno ogoli ꞌtô buo fê owotiaî many fur. Buo ômûk amanyaî îhaŋitek hunno obeŋi ꞌtô ogoli.

Osô abuk ana ahônô ahaŋitek hunno obeŋi ꞌtô ogoli, hunna anyaî ꞌtô amanyatta, hunno oduhi omijitaî.

Owon amanyatta anîa îwôr iko ihiji Kenya, Samburu County. Amanyaî Sidai iko Naeku îhaji abotie, buo honyosi iko illasi ôllô odiha ꞌtô jio ebotie haji.

Itoŋoi imanyi hosi iko illarak hosi ahou jio asik hunno ômûk, iko hutto haŋ hosi.

Iyyahatie nyia isi eesuŋ hosi ꞌdaŋ arabotie buo fê oluahitaî ahûattêk. Obeŋi isi itoŋotie îmaji abotie many fur. Iwwotitaî nyia isi ittifiarî amaji mîyaŋ ônnô ofuoi eesuŋ hosi iŋiyo.

Olîa amanyatta kûd. Obeŋ eesuŋ oremehini îŋab amarîŋ anîa buo fê atêrêjôk obeŋi oremehini ijiŋuna itua manyatta.

"Etterio hôhôî aduho ta afuatan ihidiofo îyaŋuniere eduhiti haji. Eyaŋuno hôhôî atanata ꞌyani hunne efuo hôhôî îtawoniere aaji," ajio Sidai.

Afônîk Naeku, "Emîjak hôhôî êgîamarî eduhiti hutto hidiofo iduhuniere asik hôhôî. Oluahie aatî ꞌdaŋ hutto manyatta ahûattêk hosi ta aduho."

"Ehanak hôhôî atanata hunne irosiji ꞌtô ilohitiri ôŋîda îtagoli olohitir. Etabêk hôhôî ahîdê haji ta amenni." îramio Sidai.

"Oridoi ahîdê hasik manyatta, ôŋîda oyyami obeŋ ôhûta isi addi," afônîk Naeku.

Adulo Sidai êkîana, "Alla awotia ahîdê haji, attatî hôhôî iyyehina atanata hunno ômûtarî ꞌtô ihiji tanata hunne irosiji ꞌtô."

Afônîk Naeku, "Attatî buo hôhôî ifihina amîyaŋ îhîdê haji. Anya anîa afio."

"Ifaû hôhôî ahîdê haji ênnê îhûm ꞌtô ifio tô hîdê iko tô hôlôŋ," afônîk Sidai.

Afônîk Sidai, "Osôhînî ômûk ahîdê hasik hôhôî hunna attadaî buo ômûk ôsôhînî êlûŋa."

Ajio Naeku, "Amuno nî êfîfîsa bêbê jio êrrê ꞌdaŋ huno aduho. Eharruahi hôhôî efuoto iko awôttô ihuhumuniere efuoto eduanyit. Eduanyak hôhôî efuoto anîa ilohitir. Itik olohitir anîa oyyami iko attuduha."

Adulo Sidai êkîana, "Alla aduanyanî efuoto ilohitir êttê itihonia olohitir alla ayôhô. Efîfîs buo fê hôhôî olohitir. Ogôl efuoto ênnê îfîfîsanî anîa alla ayôhô."

Afônîk Naeku, "Obeŋi ottuloni eluŋurita-haji ilohitir, atî owon aaji hôhôî iko êkat-haji ênnê îhûhûmûnî tô hîtôî."

"Alla aduanya olohitir êttê îtîlîk buo fê îtanôk atua haji," Ajio Sidai. "Iramak anîa anyio jihôhôî?ꞌ Ifî Naeku.

"Itîlîk olohitir ênnê îfîfîsî tê efuoto iko awôttô atua haji alla anôk ôlôŋ." Ellê îhacôrô, ôttûnak olohitir anîa anahan hîma ênnê înahînî itua haji." îtarraŋak haniye.

"Oluahie aatî ꞌdaŋ hutto manyatta aduho, buo fê hôhôî ꞌdaŋ eluahio etatturio hasik êllê ewwotita hôhôî.

Obeŋ êtatturio haji ôgôl efuo hôhôî buo fê iduhuri eduhiti hûnîa inyiak jio ôbô amaji," ikukubok Sidai.

"Itawwahaî eduhiti hôhôî, inyi ônnô ôbîaŋarî êlîaŋatio hosi ôgôl. Elîaŋatio hôhôî eduhiti hunno hoyiji ꞌtô tô manyatta amaruani ta akonnikonnihien iko ta sigiraa. Ihuo, ahîdê haji anna afio ꞌtô," ajio Sidai.

"Eremik buo fê hôhôî îyaŋuno eduhiti aŋejuho tô hidiofo jio amaji aŋejuk nyia," afônîk Naeku.

"Osîrû ahaŋ hôhôî êmanyît hôhôî, inyi ewwotita ga-ga-ga iko anyanya hôhôî," ajio Sidai. "Obeŋ ewwotita anîa idehi hôhôî efuo isukul iko ôrrîahat hôhôî," ajio Naeku.

"Ojio asukul hôhôî jio ijiara hôhôî ehurutta abuhi, buo fê hôhôî êtahôrô nêgêmîta sukul ꞌdaŋ îtahôrô," afônîk Sidai.