Iyange la tsô, ornyar ugenegh lu, lu a ônov mba nomso uhar.

Or la nger er, zum u un saa ku yô, wan na u vesen la a tôô ibyua na. Kpa nomkyegh na u môm môm la yô, wan na u sha uhar la a tôô.

Zum u or la saa ku kera yô, wan na u vesen la tôô ibyua na cii.

Wan na u sha uhar la di tôô nomkyegh la voogh er iyange nger la.

Shie karen kera yô, wan u vesen la gba angev. A mogh a za hen orakombo, a za pine er un a er man angev nav mbu a bee yô.

Orakombo la kaa a na er, "A gba u u sôngo nomkyegh u a nyian iyol yô."

Er lu shagbaor nahan cii kpaa, fa pe un a zua a nomkyegh u lun iyol nyian ga.

A za mase umbur er, anngbyan na ngu a nomkyegh u nyian. Tsô a tindi ior er ve za kôr ve va na un.

Mba za nyer yô, anngbyan u kiriki la kaa a ve er, "Ka cii kwagh u mo m lu a mi je la, kpa aluer gba u ka nomkyegh wam keng un a bee anngbyan wam angev yô, yem nen a mi."

Lu sha ishima na ga, kpa a gba nan ve nomkyegh la tsô.

Mba hidi a mi yô, orakombo la wua nomkyegh la na wan u lu ornyar la.

Oruange la ye je, angev bee.

Ayange nga karen kera yô, kwagh u kpiligh iyol er.

Anngbyan u lu ornyar la hii u menden ingyur iyol.

Fatyô na jighjigh a kwagh u iyange lu nengen a mi la ga.

Ze hen ityô yô, i a na er, "Kwagh ne tese er, u er a anngbyan wou doo un ga. U tôô ibyua la tswen, shi u za ngohol un nomkwegh u ter wen wundu un a mi yô.

Nahan yô, "U ingyur ne i bee'u iyol sha yô, saa anngbyan wou a de'u a kwaghbo wou hen na."

Ityô za hemen kaa er, "Se gema ihye ne, i lu ikyav i bem, se na anngbyan wou. Aluer a hamber ifyan sha mi yô, angev ou mbu a bee."

Ityô za a ihye la hen anngbyan na u kiriki, ve zamber a na er, "Hamber ifyan, de anngbyan wou a kwaghbo na."

Anngbyan u kiriki la kpa venda ga, a hamber ifyan.

Angev mbu anngbyan u lu a inyaregh la been kera yô, ityô tema, pande ibyua i iyange u vesen la lu a mi la na anngbyan u kirki la.