Amanyaî aciaŋi ariak imasik gele-gele. Amanyaî ômûk êlûlûŋ buo fê ôlûajî, buo ômûk amanyaî ababô.

Abuk ana ônô êyaba ꞌTurui iko ꞌTuroti - aniyarak yôrô hunna amanyaî ꞌtô îrrîlaî Sudan-ôttô-wôr.

Amanyaî aniyarak hûnîa iko êgayô yôrôꞌ ihuo 80,000.

Amanya êgayô yôrô ihiyyu. Oremik eyyu îwanan itua faû, îhîdê faû, kuyya buo fê itua iko îhîdê faû.

Anya aŋati hiyyu ênnê egonyu tô hîdê faû, eyyu. Olûajî ayyisi hunno ôsô ohodori hosi ihuo amîtîrî arrîhaî many miyet tô faû.

Igîamaî ayôrôꞌ hûnîa êgêmîta hosi ꞌdaŋ gele-gele buo êgêmîta hosi hûa oluahi isi ꞌdaŋ. Araî ꞌTurui iko ꞌTuroti ahêgîamak. Araî êgîamak yôrô ꞌdaŋ aŋoruo. "Hôhôî aduhok iko êsîŋak huno aduho!" ajio ꞌTurui.

Oduhoi ayôrôꞌ hunne îgîamaî ꞌtô buo fê êtaŋejuhie eyyu. Ajio ꞌTuroti, "Eduhio hôhôî ewojiti hiyyu hunno obolori ꞌtô buo fê aduho hosi ôgôl."

"Ijiara hôhôî êramak îtaî eduho hôhôî ahaŋitek hôhôî aŋaî," îkênû ꞌTuroti hunonyi. "Etterio hôhôî ta abohio apîtî tôttô tua faû."

Aŋut ꞌTurui êkîana ꞌTuroti, "Ebôk hôhôî tôttô faû ta akakam hôhôî hunno ogoli ꞌtô hûna. Eremik buo fê hôhôî êsûdûk abôrô arriaî!"

"Ihuhumuniere olohitir pîtî ônnô ôgôl ꞌtô, êfîfîsak hôhôî efuoto diyya ênnê ênyôŋ hôhôî ta amîlak hôhôî," ajio ꞌTuroti.

"Alla ayôhô êfîfîsî anîa, êttê îgôlôn ihuo amogolio. Oremik eyyu îmanya aŋasi arriaî," afônîk ꞌTurui.

"Elîaŋarû hôhôî efuoto ênnê êbôhû hôhôî illet êttê hôhôî iyyehiniere eyyu ôttô hîdê faû. Owotiatio eyyu ôttô hîdê faû ihuo agôtôr ônnô osiehini îfaû, buo fê owon iko apîtî arriaî," ajio ꞌTuroti.

"Ohodori ômûk ayisi many amîtîrî 9!" Ajio ꞌTurui.

Omuno ayôrô attûba buo fê amanyaî îgayô abotie. Owoni isi iko êgêmîta gele-gele: hunno oyyeyyei ꞌtô eyyu iko hunne îtaŋejuhie ꞌtô êgayô.

Egîamak ihuo, ꞌTuroti iko ꞌTurui, obohie buo fê oduhie eyyu. Osêŋêr yôrô îrrîrrîaî eyyu. Ofuattaî êgîamak iko ôsêŋêr hosi îmasik aŋejuho iduhori diyya.

Omijie etaŋuak yôrôꞌ nobu hosi iko ŋarriok hosiꞌ.

Owoni agûlî arriaî itua hiyyu. Owon agûl ônô nobu, agûl ônô ŋarriok yôrôꞌ iko namuguo hunno ôttûnattarîk aŋiria. Apîtî itibuoŋoni agûlî hûnîa.

Nobu hosi ôbôlô jihosi ꞌdaŋ buo fê oremik îmanya aŋasi arriaî.

Adulo ꞌTuroti êkîana, "Eduhok hôhôî apîtî kuyya ayisi hunno obocori ꞌtô allet ôŋîda oyyami ojiŋak itua hiyyu."

Afônîk ꞌTurui, "Awahî ayôrôꞌ oyyami ôŋîda isi isui." Iramio ꞌTuroti, "Eyyu ôttô hîdê faû idehi atua hiyyu obeŋ ônôk bêbê."

"Owoni afuheri hôhôî itua hiyyu, ênnê êdûlarî hôhôî êtafûrêyêk. Eŋeduno hôhôî amîyaŋ hullo odihara ꞌtô iko aranyanya ômûk, hunne êdûlaniere hôhôî êtafûrêyêk." ajio ꞌTuroti.

"Ilaman!" ajio ꞌTurui. "Itaŋiyo afuher fûrên anîa êgayô hôhôî ꞌdaŋ. Hôhôî hama jio ayôrôꞌ ꞌdaŋ êrômô êtafûrêyêhî."

Owoni êgayôꞌ yôrôꞌ iko nobu buo fê hobu hosi. Egîamak yôrô îtaŋiyei buo fê îfayêî ettaha huno êgayô hosi.

Amanyatio nobu yôrô many aŋasi 20 kuyya buo fê aŋasi 30. Oremik inyi isihina ênyôŋî hatêl jio aŋasi hunna amanyarî inyi hûnîa. Alla attolunie aŋarriok yôrô tô hatêl hosi, êttê êtaŋuak yôrôꞌ îbûŋatio isi.

Ajio ꞌTuroti, "Iŋoruaî êlûlûŋî yôrô bêbê. Isisiananî isi ꞌdaŋ êgêmîta hosi ababô ôŋîda isi amanyarîk buo fê ôŋîda êgayô hosi ôbôlô."

Afônîk ꞌTurui, "Owoni êgêmîta jihôhôî hunne êgîama hôhôî ꞌdaŋ ababô, buo hôhôî êttê îgêm êgêmîta hûa. Oyyu êgîama hôhôî êllê êgîama hôhôî ahîtaî. "Aafê," iruhok ꞌTuroti. "Ihuania, ijiara hôhôî êcaharû îbûaha."