Aker ka ishu i lun kwavyologh il, shi i lyemen iyol kpishi. Kpa i gema i nyoho inyam kpengkpeng!

Aker ka a lu shin ifi. Zum u mngerem ma om yô, a time inya a za lu shin zwa, shin angbyôr.

Wen ngu er ka ishu igenegh ga, ka a ôô ahumbe kpaa.

Iyange igenegh sev hungwa av yô, ter'm due toho a ilev yasev. Mo kpa m due vea na sha ciu m soo u lun hen ya ga.

Se mba za nyer yô, ter'm vôr nahan a tema shin itinekon lu memen. Mo m lu nengen sha uile.

Ijande igenegh lu ikyua pe iyange ilev lu yan gwergwer la. M ungwa kwagh lu eren imio shin mi. "Hub!"

Hiihii la yô, lu'm er ka ibyua yase i lu gever ye.

M til kpuee yô shi m ungwa, "Hub!" "Wow! Ka nyi di la!" M hen ken ishima mer alagh ga tsô a lu Aker shinii!

Ter'm kpa ungwa imio la pe iyange tema la. A yevese a va pe iyange m lu la.

A pine'm er, "Ka hana kwagh la a lu eren imio?" Ter'm ker kpa zua a kwagh ga.

A gba kaan er, "Aker ka a er imio maa shi a huan viing." Se kegh ato kpa se kera ungwa kwagh ga.

Iyange been yô, se hide se yem a ilev ken ya.

M ta hanma bua kor m zer ken ityô.

Ter'm kegher usu sha ambi a bua er ilev mbi a ôso yô.

Kpernan sev mbu hongo mbu aven yô, shi se due a ilev er mbi za ya toho. Ter'm za tema lu memen, mo di m lu nengen sha uile.

Sha iyange la yô, m tôô antesa m za a mi. M kaa ken ishima mer, "Nyian yô, m ngu tindin Aker ne sha tartor keng."

M gba zenden ningir, kuhwan antesa la. Tesa la lu uvan, eren imio er ka Aker nahan.

Maa Aker la za er imio, "Hub". M ta ikyenge m yila ter'm fese mer, "Aker la ngu ka heen."

M ker dagi kpa za tume shin angbyôr, shi kever. Lu ter'm va ayem va tume Aker la dagi ye.

Ter'm za teghlee dugh Aker shon shin zwa, shin angbyôr. Se yem a mi sha ya ze za ngbagh.

Ter'm ya inyam doo un. Mo vea anngbyan wam u kiriki se ya tsa na la. Se na anwya wase myam wen kpa ya.

Lu iyange i msaanyol hen tsombor wase cii.