Ngise la Anyam man Ihinga ve lu ahuraior.

Ve kuran ilev imiôngo. Or ugenegh a za a i nyian, or ugenegh nan za a i kper.

Anyam iyange fa ilev mbi koson tsembelee ga.

Un a due a i, ilev mbila mbi hide ijen keng.

Ihinga iyange a due ilev mbi koson vea ngô na. Ngô u ihinga a unde sha kon a tsoron ahur a ndor a haan shin inya.

Ngôhinga un a haan ahu la yô, i doo ilev kpishi, i yaan a iember.

Iyange igenegh sev hungwa av tsô, Anyam pine Ihinga er, "I er nena ver ka we a due a ilev mbin mbi ide, man ka a lu mo yô, i hide ijen. Ka nyi ka u ere?"

Ihinga gema hôn wegh sha iyôgh ki ken atse la.

Ihinga kaa er, "Ka m dugh iyôgh ki la, m bende ilev mbin shin ica. I cia i kar ayem i yem u keren kwaghyan. Kpa ka we a due a i yô, i gba tilen ijiir imiôm tsô. Ka nahan i zoo a kwaghyan ga ye."

Ishima vihi Anyam keregh, a kaa ken ishima na er, "Ibyume Ihinga ne ngu ôron mo kwagh u mimi ga, ngu sen mo a se. Kper me dondo un me za nenge kwagh u ka a er la."

Kpernan yô, Anyam dondo Ihinga shie u due yô. Lu dondon ve ken myer sha er ve a nenge a na ga yô.

Lu kenger ve ken ica.

Iviha za tile shin itinekon maa yila, "Mama! Due a se va wase'm! M zua a kwaghyan m na ilev mbin."

Fese je ngô u Ihinga due gba va wasen wan na. Lu tsoron ahu a ndor haan shin inya.

Anyam kaa ken ishima er, "U nenge a se kpa! Ngô u Ihinga ka a va wasen wen. Mba ngbaghen iyôgh mba benden ilev shin ica ga.

Ishima vihi un keregh. Anyam kaa er, "Injanayô, ka mo ashen Ihinga a soo u bumen ye zee? Me tese un kwagh keng."

Kpernan la yô, lu kwa u Anyam u nan ilev kwaghyan. Tsô a za a ilev mbila hen itinekon, a za yila er, "Mama! Va wase'm m na ilev kwaghyan."

Ngô u Ihinga hongo shin inya yô, Anyam ta sha mi wua.

Kpernan shi gba sha iyange i Ihinga.

Ihinga shi kura ilev za a mi hen itinekon za yila er, "Mama! Va wase'm m na ilev kwaghyan." Kpa or vengese ga. Or due ga. Tsô shi Ihinga yila, "Mama! U ngu hana?"

Tsô Ihinga za mase kaven ken ishima gba vaan kaan er, "Kpei, Mama, bee'm keng er u kera ngu uma ga nahan. Ka Anyam a woo'u ye ga?"

Iyange la cii Ihinga lu a mlyam ashe, vaa nyian ashe.

Iyange been yô, Ihinga yem a ilev ken ya. Anyam nengen a Ihinga yô, a gba pinen un er, "Ka nyi i ze iyol, er nan ashe ou a nyian nahana?"

Ihinga kaa a na er, "M zua a ortwer nyian, a na'm icigh m ta ken ashe. Sha nahan yô, me vese kpishi shi me taver agee iyol."

Tsô Anyam kaa a Ihinga er, "Mo kpa icigh you ki la doo'm. A za hemen a pine er, u fatyô u nan mo cuku je kpa?"

Ihinga rumun er un a fatyô, kpa gema kaa a Anyam er, "Icigh ki la yegh ken ashe kpisi, alagha u soo ki ga."

Anyam yav inya bugh ashe, a kaa er, "Gba tan mo tsô."

Iviha iyange sange awen a kiriki haa sha atse. Awen la nyian boong!

Iviha kula awen la gema haa Anyam ken ashe. Anyam ngor vaa er, "Kula awen ne kera!" Hingir Anyam inja er un pir ashe yô. Anyam kaa er, "Hide'm a ashe am heregh."

Ihinga kaa a Anyam er, me hide'u ashe ou, aluer u hide'm a ngô yô.