Ŵandu akusatama m'majumba ga mitundu jakulekanganalekangana. Ŵandu ŵane akusatama m'majumba gamwinani. Ŵane akusatama m'majumba gapasi.

Nyumba syelewu kukomboleka kukola nyumba syakutama ŵandu syejinji syasitaŵigwe mwakusajikanya. Nganiji jikwamba ya kutaŵa nyumba jesajikane jajikwete majumba gejinji.

Mishelle ni Catherine ali mundu ni mcemwaligwe. Mishelle asigele panandi kumalisya majiganyo ga sekondale. Catherine ali m'caka cakumalisya ca kupulayimale.

Acalongoŵa akusatama ni acinangolo ŵawo ni anganga ŵawo ŵakongwe, m'nyumba jelewu mu Nairobi. Akusanonyela kutama m'nyumba jamwinani mwa msindawo, mpela yijuni m'citela celewu mnope.

Liŵasali likusatama m'yipinda yayili mu nyumba ja 22 ja nyumba jesajikane. Akusakamulisya masengo cikepi pakuja ku nyumba jawo.

Catherine akusaŵalanga majumba pakwawula mwinani ni pakwawula pasi. Akusasaka ali aŵele jwakwendesya ndege lisiku line. Mishelle akusasaka ali aŵele injiniya ni kutaŵa majumba gesajikane.

Catherine akuwusya, "Ana nyumba jetuji jelewu mnope mu Africa?"

Mishelle akwanga, "Iyayi, ulewu wa nyumbaji uli ciŵandika mamita 126. Nyumba jelewu mnope mu Africa jikusapunda panandi mamita 393. Nyumba jelewu mnope pa cilambo cosope jili ciŵandika mamita 830!"

"Ee! Ana nyumba syelewu camti myoyosyo uli syangagwa?" Catherine akusimonga.

"Nyumba syesajikane sikusataŵigwa mwakulandana.Yilingo yekulungwa yakutaŵila nyumbaji yili cisyano ni komkiliti.

Nyumba jesajikane jikusataŵigwa nyumba kwa nyumba, kutanda ni cijumba cacisyano, ni kutaga komkiliti mwakucisyungulila cijumbaco. Yilingoyo pamo yikusaŵa yakulimbangana mnope ni yangajonasika citema," Mishelle akwanga.

Kuti ataŵe nyumba jesajikane, ŵakutaŵa akwenela kulongola kusola lisimbo lyakusokoka lyakuti ataŵe fendeshoni ja nyumbajo.

Mpela mwayikusaŵela citela celewu cana miciga jekulungwa, jejinjile mwitaka mnope, nyumba jesajikane jikwenela kukola fendeshoni jakulimbangana pa mbuŵa ja liganga. Ndaŵi sine lwalalu lukusaŵa lwejinjile mwitaka mnope.

Kaneko, ŵakutaŵawo akusapanganya cijumba ca nyumbajo. Akusataŵa cijumbaci ni yisyano yelewu.

Cijumba cacisyano cikusakombolekasya kutaŵa nyumba jelewu. Cisyano cikusakomboleka kunyakula usito wejinji.

Cijumba cacisyano cili cindu cakulimbanganya ca nyumbaji, mpela mawupa ga cilu ca mundu.

Cisyano kukomboleka soni kupindika ni kongoka. Yayikugopolela kuti nyumba mpaka jitenganyiceje panandi (amtamose kuti yeleyi yili yakusawusya kuyiwona).

Ndaŵi ja mbungo mnope kapena cisukunya, cijumba cacisyanoco cikusakombolekasya nyumbaji kutenganyika panandi.

Cisyano cikusapanganya cindu cakulimbanganya ku macili gakutenganyika.

Cilingo cine cekulungwa cili komkiliti. Komkiliti jili m'wangawanga wa msanga, simenti, ni mesi. Ŵakutaŵawo akusawanganya yindu kuti apanganye yindu yakandapala, yakusayikusulila mwakusyungulila cijumba cacisyano.

Pati apanganyisye komkilitijo, jikusakamulana mnope, mpela liganga. Celeci cikusapanganya pasi ni mapupa ga nyumbajo.

Ŵakutaŵawo akusataŵa nyumbajo mwakuja mwinani, nyumba kwa nyumba. Nyumba syapasi sikwenela kunyakula usito wejinji. Komkiliti jikusanyakula usitowo, kujitendekasya nyumbajo kuŵa jakulimbangana ni jakutamilicika.

Komkiliti jili mbuŵa jajisyungulile cijumba cacisyano, kuciteteya cisyanoco ku mesi ni mpweya. (Mesi ni mpweya yikusatandikasya mkuwo pa cisyano.)

Yipilala ya yikepi kapena yida yakunyakulila yindu nombe nayo yikusataŵigwa pandaŵi jeleji. Pandaŵi jakuti cijumba cacisyano ni komkiliti cimasile kutaŵa, ŵakutaŵawo akusaŵika mawindo. Ni kaneko akusaŵika masiling'i ni mapupa nambo soni kumalisya kupanganya pasi.

Nyumbaji jikusasosekwa kuŵika ndambo syamagesi ni mapayipi ga mesi ni yacasa.

Pakumalisya, ŵakutaŵawo akusaŵika magesi, matanga, makabati, ni yindu yine yakukamulisya masengo pa umi nambo soni pakukamula masengo m'nyumba jesajikane.

Mishelle akuti, "Misinda jejinji malo gakwe gakumala. Nyumba syelewu sikusakamulisya masengo cenene malo gagapali. Pacinjiŵa injiniyapo, cinjikamucisya kutaŵa nyumba jelewu mnope pa cilambo capasi!"