Ŵandu akusatama m'majumba ga mitundu jakulekanganalekangana. Nyumba sine sikusataŵigwa ni yilingo yacilengedwe, mpela manyasi. Nyumba sine sikusataŵigwa ni yilingo yakupanganyigwa ni ŵandu, mpela magalasi ni komkiliti.

Nyumba sine sikusataŵigwa ni yilingo yinayiŵiyi; yacilengedwe ni yakupanganyigwa ni ŵandu, mpela nyumba jandendela jajikukolanjigwa mu nganiji.

Kabo ni Thabo akusatama m'boma ja Kgatleng, cilambo ca Botswana, mwakuŵandicila musi wa Mochudi. Akusatama m'nyumba jandendela ni acinangolo ŵawo.

"Nyumba jandendela jili nyumba jandamo jajili jankusyungulila jajikwete msakasa wewimbe. Nyumba syelesi sitaŵigwe m'mawupande ga kummwela kwa Africa," Kabo akulondesya.

Thabo akupitilisya kuti, "Nyumba syejinji syandendela sili syakusyungulila, syana mlango ni mawindo. Tukwete mawindo gamagalasi, ganganigapagwa kalakala."

"Anganga ŵetu ŵalume ŵataŵile nyumba jandendelaji mwacikala. Baba ŵetu ŵajonjecesye yindu yine yasambano," Kabo akuti myoyo.

"Kwende tulondesye masengo gakutaŵa nyumbaji," Kabo akupeleka nganisyo.

Ni akuti, "Mabilidala gakamulisye masengo matabwa, manyasi gakuwimbila msakasa, maganga, matope gakuŵacila ni kutendela pulasitala.

Ŵatandite ni kusola lisimbo. Mwisimbomo ŵaŵisile maganga gamwanamwana, litaka, ni msanga. Yeleyi yapanganyisye fendeshoni jekamulane mnope ni jakulimbangana."

Thabo akupitilisya kuti, "Mabilidalago gasimice sici syacitela syelewu mu fendeshonijo, mwakusyungulila mbali jakusa ja fendeshonijo. Ŵasitaŵikenye sicisyo pamo, kulinganya cijumba cayitela cakupanganyicisya mapupa gakusa.

Pagamasile kutaŵa cijumbaco, mabilidalago gaŵisile maganga gamwanamwana mwakutitiganya m'mapesa ga cijumbaco."

"Kaneko, ŵawanganyisye litope, mesi, ni ndoŵe sya ng'ombe. Yeleyi yikusapanganya unya jamatope jacilengedwe jajikusalimba mnope jili jijumwile. Ŵaŵisile matopega m'mapesa ga magangago kuti gakajendajenda," Kabo akuti.

"Kutaŵa ni maganga gamwanamwana ni matope kukusapanganya mapupa gakulimbangana gangajonasika citema," Thabo akonjecesya.

Kabo akuti, "Mapupa gapasa ga mbuŵa jekulungwago gakusakutila nyumba jetu jandendela."

Thabo akulondesya, "Kukutila kukugopolela kuti mkati mwa nyumbaji mukusasisimila pandaŵi jacitukuta. Mtukuta wa lyuŵa wangapeleta mapupaga.

"Ku malo kwakusisima, cikutiloci cikusasunga mtukuta wakutukutisya mkatimo."

"Mabilidala gapanganyisye pasi pa nyumba jetu pakuŵika matope mu fendeshoni jaŵapanganyisye," Thabo akuti myoyo.

Kabo akuti, "Kuti amalisye kupanganya pasi, ŵaŵisile mbuŵa jakumalisya ja matope ni ŵajibamandile. Yeleyi yajumwile ni yapanganyisye malo gatyatyatya."

Thabo akuti, "Mbali jakumalisya ja masengoga jaliji kupanganya msakasa. Nyumba jandendela kukangala kukola msakasa wesongoce pakatikati.

Mabilidala gapanganyisye cipagala cayitela yeyitaŵikanye pamo mwakusongoka pakatikati ja cipagalaco. Ŵataŵilile tutita twa manyasi gakuwimbila ku mbalaŵala sya cipagalaco mu mbuŵa. Msakasa wewimbe ngawukusasulula."

Manyasi gakuwimbila gali cindu cakusosekwa mnope pakupanganya msakasa. Nambo cindu cacilengedweci cikusapanganya soni nyumba jambone ja tulombo ni yinyama yine. Yejinji mwayeleyo yili yakonanga!

Mlole pa cipikicala ni mpate: ndandambuli sitatu, ciŵalaŵala, litono, ucece, ni likoswe?

Yindu yacilengedwe mpela manyasi gakuwimbila yikusapanganya malo gambone ga ndandambuli gakutama ni kusakula.

Ndandambuli syangajonanga manyasigo ni sikusakamucisya kunandiya winji wa tulombo twine.

Tukwenela kugasamalilaga manyasigo kuti mukatamaga yilombo mpela likoswe, utitili, ni ucece.

"Tupali ŵajinji ŵatukutama m'majumba gakusyungulilaga!" Thabo akuti myoyo, ali mkulola ku msakasako. Akogopa ndandambuli.

"Nikutitu pana yine yayikusatama m'malo gagatusyungulile uwe?" Kabo akuwusya, mwawoga.

"Pacinjitaŵa nyumba jangu, cinjitaŵa jandendela jamsakasa wamapale!" Kabo akuseka.