Madina ali mwanace jwamkongwe jwamkulungwa mu liŵasa lya Ce Kazembe.

Liŵasali likusatama mu msinda wa Lilongwe.

Ligulo line, Madina ŵapite kukuwugala litanga.

Ŵam'weni msikana ni mnyamata.

Madina ŵaliji ŵakusimonga pakwawona ŵanace ŵaŵili ŵacilendo.

Ŵaŵilasile baba ŵawo, "Baba! Baba! Pana ŵanace ŵaŵili pamlango."

Baba ŵapite mwacitema kumlangoko.

Paŵaweni ŵanacewo, ŵawusisye kuti, "Ana jamanja ŵani? Mkutyocela kwapi?"

Mnyamatajo jwaŵecete kuti, "Une Asamu, aŵa cemwali ŵangu ŵamwana, Asante"

Asamu ni Asante ŵawonekaga kuti apesile nambo soni ŵawoga ni ŵakudandawula mnope.

Asamu ŵapitilisye kulondesya kuti, "Tukutyocela pa musi wa Songani, m'dela ja Domasi."

Baba ŵaliji ŵakusimonga mnope mwakuti nganakola yakuŵeceta.

Madina ŵatite kuti, "Baba, mwalece ajinjile. Apesile mnope nambo soni jakwete sala. Tukwenela kwakamucisya."

Asante ŵaŵecete kandanda.

"Musi wetu ŵaputigwe ngondo. Acinangolo ŵetu ŵawile. Nganitukola cine cilicose."

Ŵapitilisye kuŵeceta ni maloŵe gawo gawanace.

"Tuŵele tuli mkwenda kwa masiku yigala. Ngatukumanyilila kwakwawula kapena cakutenda."

Ni kaneko, ali atambasukwile makono, Baba ŵakumbatile ŵanacewo.

"Mjinjile, ŵanace mmwe, akuno ni kumangwenu
Cituŵecetane yakwamba yeleyo pacimpumulepo," ŵatite myoyo.

Ŵanacewo ŵalile ni liŵasalyo ngonelo, cakulya candanda camtukuta caŵacipatile panyuma pa masiku yigala ngalya.

Kaneko, Madina ŵajigalile Asamu ni Asante ku yipinda yawo.

Kutyocela lisiku lyelelyo, Asamu ni Asante ŵajigaligwe kuŵa ŵamo ŵa liŵasa lya Ce KAZEMBE.

Akusang'anda ni kutenda masengo gosope gapanyumba pamo ni ŵanace ŵane.