Kalakala, kwapali acalume msano ŵangali lunda ŵaŵatamaga pamo. Ŵagaŵanaga cilicose.

Lisiku line, nganakola yakulya. Ŵatesile msongano. "Ana yakulya yetu yine citukayipate kwapi?" Jumo mwa jamanjawo jwawusisye myoyo.

Nganakola cakwanga cacitema ku ciwusyo celeci ligongo nganakola mbiya nambo soni acimjawo mu delajo.

Pambesi pakuganisya kwakandaŵi kamnono, jumo mwa jamanjawo ŵatite kuti, "Kwende tujawuleje!" Mundu jwaŵili jwawusisye kuti, "Kwapi?"

Mundu jwatatu jwatite kuti, "Kukwiŵa yakulya." Mundu jwamcece jwatite kuti, "Ngatuja kukamulwa?" Mundu jwamsano jwatite kuti, "Ngasimdandawula yakwamba yeleyo!"

Acalume msanowo ŵapite kumsika kukwiŵa cinecakwe cakuti alye.

Natandape kwiŵako, ŵakamwilwe!

Acalume msanowo ŵajigalile kupolisi.

Pakutenda kawungunya, ŵapolisi ŵawusisye kuti, "Ana syaliji nganisyo syaŵani syakuja kukwiŵa yakulya?"

Acalumewo ŵatandite kusongonelana. Ni kaneko ŵasalile ŵapolisiwo mwayatendecele.

Mundu jwandandajo jwatite kuti, "Une nagambile kupeleka nganisyo syakuti tujawuleje, ngaŵa syakuti tukajiŵe." Mundu jwaŵilijo jwatite kuti, "Une nakwete lung'wanu kuti manyilile kwatwajawulaga."

Mundu jwatatujo jwatite kuti, "Wosope twakamulene kuti tukasose yakulya."

Mundu jwamcecejo jwatite kuti, "Natetele wosope mwetuwe kuti tukakamulwe."

Ni mundu jwamsanojo jwatite kuti, "Wosope tukumanyilila kuti tuli ŵawiyi, ni ligongo lyakwe natite kuti, 'Ngasimdandawula yakwamba yeleyo'."

Pambesi pakupikana yeleyi, ŵapolisi ŵayiweni kuti acalume msano wosopewo ŵajigele mbali pa wiyiwo.

Jwapolisi jwamalisisye pakuŵeceta kuti, "Sili nganisyo syambone kugaŵana cilicose, kupatula nganisyo syakusakala!"