Mu tawuni jinejakwe, mwatamaga msikana jwakusalala lina lyawo lyaliji Ella.

Ŵaliji ŵalewu, ŵapiliwu, ŵa umbo syepiliwu. Ŵakwete meso gakwisya lung'wanu.

Ella ŵakwete meno gakusalala geswela mpela ngale. Ŵaliji msikana jwacanasa ni jwakulimbicila masengo.

Nambo soni nganiŵasawusyaga acinangolo ŵawo. Cindu cimope cacasakalisyaga acinangolo ŵawo caliji lung'wanu lwawo lwakusaka kuyimanyilila yindu. Ŵawusyaga yiwusyo yacilendo.

Mwacilandanyo, pajatence pensulo jawo, Ella ŵawusisye mama ŵawo kuti, "Mama, ana pensulo jangu jipite kwinani?"

Acinangolo ŵawo ŵapesile ni yiwusyo yawo yejinji ni myoyo ndaŵi sine, nganiŵatendelaga atende.

Nambope, alumbuŵawo Ella, Henry, ndaŵi syosope ŵayipikanilaga yiwusyo ya Ella. Pajagwaga ula, ŵawusisye kuti, "Ana ula jikulila m'mawunde?"

Alumbuŵawo ŵasecile ni kwajanga kuti "Iyayi!" Ŵapitilisye kulondesya kuti ula jikusagwa pandaŵi jakuti lipujungu lyalili mu mlengalenga lisisime.

Lisiku line, ŵaganisisye yakwendajenda. Paŵajendaga, ŵaciweni citela ca apulosi ni mwangosi ŵatemenye lujambi lwakwe.

"Oh, Iyayi! Cikusosekwa dokotala," Ella ŵatite myoyo. Mwakusimonjesya, citelaco cajanjile kuti, "Elo, ngusosekwa dokotala."

Ella ŵasimonjile ni ŵaciwusisye kuti, "Yikombolece camtuli kuti mmwe mŵecete?" Citelaco cajanjile kuti, "Une ndili citela campaka cimjanje mawusyo genu gosope."

Ella ŵaciwusisye soni kuti, "Ana ligongo cici mnyamataju ngakumpikana mmwejo?" Citelaco cajanjile kuti, "Ligongo lyakuti nganawusya chiwusyo."

Ella ŵawutucile alumbuŵawo ni ŵasalile yayatendece. Wanaŵaŵiliwo mwacitema ŵawutucile ku citelaco. Henry ŵaciwusisye kuti, "Ana mmwejo mli cisyesyene?"

Citelaco cajanjile kuti, "Une ndili cisyesyene." Ŵanaŵaŵiliwo ŵaŵinile mwakusengwa.

Kutyocela pelepo, nganiŵasokonasyeje soni acinangolo ŵawo.

Ndaŵi jilijose jaŵakwete ciwusyo, ŵajawulaga ku citela ca apulosico ni cajangaga yiwusyo yawo.