Ngise la tsô, Dwem ugenegh lu ken tar u Mkosi, wa hua kpishi.

Kurugh di gema lu ikyua a tar la, kpa wa atseregh er mbanyam mbagenev ga. Kurugh ne lu huror u Dwem.

Iyange Dwem ungwa er, aluer u per ifi u gba yande la yô, u zua a zaryouo u nyohon dedoo. A gba keren gbenda.

I kaa er, Iyou la ka i yem zende kwa môm ken inyom, shi ve wundu akpaayouo i kuma sati môm ajimin.

Dwem kaa a Kurugh er, "A gba u se zua a zaryouo la keng, shie u Iyou la i a yem zende yô."

Cier Kurugh iyol u zan zende la kpishi, kpa er lu zumbee yum yô, taver un u vendan.

Iyange igenegh sev mbu aven yô, ve uhar ve mogh u zan pe akpaayouo la a lu la. Dwem hemen ndura ndura, Kurugh lu masen van ken ijime a mciem iyol.

Ve yem ve za unde agundu, ve hungwa shin apev, ve zende ve kaa ugburumaa.

Ve mase za peren zege ifi la, cii shi ve gba yemen ye.

Ken masejime yô, ve za nyôr pe akpaayouo la lu zer sha kon sha igyungu la. Dwem kar ayem sha utaha.

Kurugh iyange vôr, lu inja er un a hume yô, sha ciu ijen lu kôr un kpishi.

Iyange Dwem za nyer je, kera ngôôr ga je kar za gba ave sha ikpyayou i vesen la.

A ta ikyenge a yila Kurugh, a kaa er, "Unde sha kon fese za gbidye ikpayou la i gba shin inya."

Kurugh nôngo tegh tegh za mase unden sha kon. Lu fan ken ishima je er, un a er asenge je un a lyemen a gba.

Ishima vihi Dwem tsô gba zôhôn a Kurugh shi ngoron.

Iyange Kurugh za bende a ikpyayou la ave yô zee! Iyou ger keregh diiing! Kurugh gba ngoron kaan er, "Iyou ngi keregh!"

Kurugh cia iyol maa osogh za ta shin inya. Ikpyayou kpa osogh cii sha na.

Kurugh iyange za ta shin inya kpugh, ikpyayou va gba cir Kurugh shin inya.

Dwem yem gba za ndiar zaryouo la. Tsô asema vihi Iyou la a Dwem.

Iyou mogh gba tan Dwem hanmajiir cii.

Dwem kar ayem, kpa Iyou cir sha na.

Dwem yevese hungwa agungu la, kar za per mngerem, yem ken ugburumaa mbala, sen shin pev.

Iyou kpa hide ijime ga, lu tan Dwem ningir a mi.

Kurugh di yav pe iyange gba la, va mase kaven er hanmakwagh a hingir ving yô.

Zaryouo la uma man var un sha igyundu.

Kurugh va mase kuren ken ishima na er, un kera ngu keren ijiir i za yeren ga.

Igbyende ne hingir un kurayol hegen.

Dwem iyange vôr gande, cii u a nyôr ken ya na yô, hume hen gbenda.

Va nderen yô, mase kaven er iyol na i hingir a amiam yô.

Ka pe i lu ver, Kurugh a hingir a Igbyende sha igyundu, shi Kurugh kpaa a hingir a amiam iyol je la.

Dwem mase tôndon zwa er, un a kera ii ga. Dwem man Kurugh kpa hingir u kera lun ahuraior ga.