Iyange sev hungwa av tsô, Dwem man Bagu ve lu.

Iyange igenegh yô, Dwem man Bagu ve zôhô zwa. Ve mogh ve za hen jôôji er a za ôr ve ijir.

Jôôji ongo mkaanem vev been yô, gba cian u kuren ijir la.

A hen ken ishima er, "Aluer m na Dwem ibyo yô, un a ya'm ibyua. Shi aluer m na Bagu ibyo yô, un a ya'm ikyuleke. Nahan me er nena?"

Jôôji za mase zuan a mhen ken ishima na, a kaa a ve er, "Ijir yene ne taver mo u kuren tswen. Za nen hen ityô i hen tar wase i za ôr ne ijir."

Maa Dwem man Bagu ve yem hen ityô.

Ve za pase zayol ve hen ityô.

Ityô ongo yô, ve kpa ve yem cian u kuren ijir la.

Ve gba lamen ivyarvyase kaan er, "Aluer se na Bagu ishô, Dwem un a ya se ibyua. Aluer se na Dwem ishô, Bagu un a ya se ikyuleke." Tsô ityô kaa a Dwem man Bagu er, ijir ve ne taver u kuren.

Ityô za umbur icankwase ugenegh. Wen lu a kwagh u saan ishe un ga, lu a ibyua ga, lu a ikyuleke ga.

Ve kaa ayolave er, "Icankwase la a fatyô u kuren ijir la a mciem shio." Ve kaa a Dwem man Bagu er ve za kohol un.

Mba za nyer hen ya u icankwase la yô, ve tôô zayol la ve pase un. A rumun u ôron ve ijir.

Kpa a kaa a ve er, a gba u un a lam a ve môm môm.

Tsô icankwase la hemen yilan Dwem, a kaa a na er, "We u ngu a icivir kpishi, u kehe shi u taver iyol. Er nena u yem u za zôhôn zwa vea Bagu u a lu cuku laa?"

Icankwase la za hemen kaa a Dwem er, "Aluer ior ungwa kwagh la yô, ve a kera na'u icivir ga. De kera zehe vea Bagu ga."

Dwem kaa er, "U ôr ka mimi, mo kpa me kera za hemen a iyongo la ga."

Icankwase la shi yila Bagu, a kaa a na er, "We u ngu tsevtsev kpishi shi u dooashe u hemba Dwem. Er nan u yem u lu za zôhô zwa vea Dwem u a hom iyol shi a ye akaa a hôôn laa? U hen wer ior ve a ungwa yô, ve a kenger we nena?"

Bagu ongo yô, a kaa er, "U ôr ka mimi, me kera ngee kwagh ga, me de zayol la a bee."

Ka been kera yô, icankwase la yila ve cii, a kaa a ve er, "Ne cii ne rumun er zayol la a bee hegen. Nahan de nen ayolaen a kwaghbo."

Ve cii ve na zamber hen ayolave, ve kure zayol la, iyongo bee.

Ior mbagenev mba ongo yô, nyiishi kpirigh ve iyol. Ve gba henen gbenda u icankwase la a za kur ijir la man ityô i fetyô u kuren ga la.