Ngise ngise la, Gberanger lu kwavyologh pupuu seghsegh; hen shie la ijen gema gba kpishi. Iuer kar kpishi man wura nôô ga.

Toho hingir zunguluu, ahu ndoor sha ikyon cii, iagh uma cica. Ikyuran, Igyotoho man Gberanger mogh yem zende ica, u za keren mngerem.

Iyange igenegh sev hongo aven yô, Ikyuran za ande sha kungwa mnger. Ze ikyua yô, ungwa imio lam sha kume er, "Kar heen kera, fese je! Ga tar u a gba! Ijiir ne ka kungwa u Mbakya!"

Cier Ikyuran iyol. Gem yô, nenge Ikya tema sha avande lu ngbaghen ayaba sha usu.

Ikyuran pine er, "Ka imiura i ker'm ve m ve ye, nombor wam ngu torogh, ka han u soo wer m za zua a mngerem m ma?"

Ikya kôngol hou shin ikyegh, a kaa er, "Ka zayol wam la ga, kar heen sha fese je, ga u va zua a zayol. Kungwa ne ka u Mbakya."

Ikpyam nengen er Ikya pon anyi yô, a cia tsô a kar kera.

Ica gbe ga yô, Igyotoho za va ayem zaaar. U un a shirigh zwa shin mnger nahan, ungwa ikyenge i sha kume, i kaa er, "Kar heen kera, fese je! Ga tar u a gba! Ijiir ne ka kungwa u Mbakya!"

Kpiligh Igyotoho iyol, gem yô, a nenge a tse Ikya ne tema sha vande lu ngbagben ayaba sha usu.

Igyotoho pine er, "Imiura kôr'm dedoo, hingir mo ken zwa er m ya ihyundu nahan. Ka han me zua a mngerem me ma?"

Bagu kporogh ikyegh, a kaa er, "Ka zayol wam la ga! Bee heen sha, ga kwagh a za'u iyol. Kungwa ne ka u Mbakya."

Igyotoho ta azeza heregh, kpa nengen er Ikya pon anyi cier iyol yô. A tim tsa sha aôndo tsô a kar kera.

Shie karen kpuee yô, Gberanger kpa va due hen kungwa la. Lu a za ikyua a mngerem mala ga tsô ungwa ikyenge i sha kume lu kaan er, "Kar heen kera, fese je! Ga kwagh u zan iyol un a er heen! Ijiir ne ka kungwa u Mbakya!"

Gberanger ta ahenga maa gema kenger sha. A nenge a Ikya tema sha vande lu ngbaghen ayaba.

Gberanger pine er, "Imiura kôr'm dedoo, inja er nombor wam tsa ken won nahan, ka hana me zua a mngerem me ma jim?" Ikya kaa er, "Ka zayol wam la ga, bee heen kera! Ga tar u a gba nyian! Ijiir ne ka kungwa u Mbakya."

Tse Ikya la pon anyi er i cier iyol, kpa Gberanger cia ga. Gberanger kar a ishimanyoon yemen pe Ikya lu tema la. A za ta sha atse, usu tsenda, ayaba purugh za haa inya.

Ikya mogh kar ayem, kpa Gberanger kohol keng. Gberanger senda un pandegh, Ikya ngor vaa; tsuwe yem sha aôndo.

Ikya yem za baver iniôndo sha avande. Er vande la lu tsee kpishi yô, Ikya torogh iniôndo. Hii sha iyange la zanzan nyian Ikya kera ngi a ice sha iniôndo ga.

Er iyange Gberanger ta sha atse za due keela yô, kwavyologh na pande hia ajiir agenegh, wen kpa a hingir u gberen anger iyol zanzan nyian ye.

Hii hen iyange la je mbanyam cii hingir u za man mngerem shin kungwa la.

Hanma pepe ve a za u man mngerem yô, Ikyuran, Igyotoho man Gberanger ve tôô imio er, "Va kar nen gôngol ayem heen cii ne yem zende ye, kungwa ne hingir u mbanyam cii!"