Ngise la, tugh ilen ken tar u Opio ga.

Ior yaven shie u ve er tom ve ver tseegh, ve eren tom hanmashie u ve lu per yô.

Iyange igenegh sev hungwa av tsô, Opio due ikyôryaren vea anwyaav nav. Ica gbe ga yô anwyaav mbala cir zendan ashim.

Opio cir sha ve. Ve gba yemen, un a za vôr yô, a tema a mem tsô shi a mogh. Kpa kera nenge a anwyaav nav ga.

Ayange nga karen kpuee yô, za due hen kpentar ugenegh, a kar za hen orya la, a za kaa a na er, "M zenda ashim shie vese, m vôr hegen. M soo mer ma m mem."

Orya la kaa a na er, "Tema inya mem. U zua a tashi nahan a doo'u kpa?" Imiura lu kôr Opio kpishi kpa a bende tashi la cuku tsô maa a gba mnyam je.

Va nderen yô, a kera fatyô a nenge ga. A bugh ashe a hide a kusu acin imiôngo. A kaa a or la er, "U na'm tashi u bo m ma, m kera ngu fantyô u nengen ga!"

Or la kaa a na er, "Kwagh za'u iyol ga, ka tugh mbu il ye." Or la za hemen pine un er, "Er i lu je u ngu a nenge a imie gaa? Iyange ngi a bee ver imie i wa ye."

Opio shi pinen or la kwagh u a lu tugh yô. Or la pasen wen yô, kwagh shon doo un. Ve lam zanzan sev av.

Shi Opio tsa heregh sha er un a nenge er tugh mbu a ile yô.

Kpernan sev mbu aven yô, a pine huror na la er, "Me er nena ver me yem a tugh ken tar wama? M soo mer ior av kpa ve fa tugh."

Or la kaa a na er, "Tugh mbu a hiin u ilen yô, maa u mogh zende. Kpa we a mogh yô, de gem ashe ken ijime ga, zanzan u kar nyôron sha tar wou."

Opio kpa er di voogh er iyange i ôr er a er la. Tugh ngur ilen yô, a mogh zende u yemen ken tar na.

Lu yemen, imie lu van un ken ijime; sar un kpighi u geman nengen kpa gba wan ishima tsô.

Za nyer hen tar na yô, ior yem cian un a cia. Ve pine Opio er, "Ka nyi uange u za ve se a mi laa? Er nena imie i lu dondon we ken ijime?"

Opio kaa a ve er, "Ahuraior am, mba yel kwagh ne er, tugh. Er i cier ne iyol nahan, ka pe mo kpa iyange cier mo iyol je la."

Opio za hemen pase ve, a kaa a ve er, "Ne va hen u soon tugh mbun. Se eren nen tom atetan, a luun tugh yô, se gema se mem."

Ka pe iyange i hii ver tugh va hen tar u Opio je la.