Odongo man Apiyo lu ken geri vea ter ve. Kpa hanma shie yô, ve ver ashe a memyol keng.

Kwa ne yô, lu sha ciu ve a mem makeranta u zan tseegh ga, kpa lu sha ciu gba u ve a za ken ngô ve u vesen. Ngô ve tema ya ikyua a zege kungwa ugenegh.

Iyange saan Odongo man Apiyo iyol kpishi sha u shi za nengen a ngô ve u vesen. Iyange ve wa akpa, shi ve wa iyol u kpernan ve a yem zende la yô.

Tugh mbula cii ve fatyô ve yav ga, ve lam zanzan sev av.

Kpernan sha use je ve mogh zende la shin mato vea ter ve.

Ve lu yemen karen iwyo, inyamtoho man ishule cii. Ve lu ôron ingyeegh ki umato sha gbenda, shi ve lu wan atsam yemen.

Ica gbe ga yô, mbayev mbala gba mnyam.

Mba za nyer shin ya yô, ter ve nder Odongo man Apiyo. Mba moghon yô, ve nenge a Nyar-Kanyada, ngô ve u vesen, tema shin itinekon lu memen.

Ken zwa ve yô, ikyav i Nyar-Kanyada ka, "Wan u Mbakanyada". Iyange mama taver iyol gbang, shi doo kwase kpaa.

Nyar-Kanyada sugh ve za van. Mama mogh lu masen vinen amar ningir a iember.

Iyange saan mbayev mbala u nan ngô ve u vesen uyua mba iyange ve va un a mi yô. Odongo kaa a ngô ve er, "Vande bughun i yam", Apiyô kpa shi kimbir nahala.

Bughun uyua mbala yô, Nyar-Kanyada haa mbayev nav ivyeren iyol er ve eren ken tar ve la.

Ngôôr ga je tsô Odongo man Apiyo ve due iniumbe ken won.

Ve gba mi zenda ukokombo kua annyonov.

Ve yem unden sha ikyon. Shi ve yem numben a mngerem ma shin kungwa la kpaa.

Iyange been yô, ve hide hen ya u za yan kwaghyan u aikie.

Ve lu a ya akaa ve bee ga tsô ve hii u meer mnyam.

Kpernan yô, ter u mbayev mbala hide yem ken geri, wundu ve a Nyar-Kanyada.

Odongo man Apiyo ve hen u wasen ngô ve u vesen sha akaa a hen ya.

Ve za tav ikyon shi ve kese mngerem. Ve kohol ajiakyegh ve va a mi, shi ve zôr ikyaiue ken akôngo kpaa.

Nyar-Kanyada tese mbayev nav u jiidi kwaghyan tsembelee.

A tese ve u jiidi cinkafa i wan ikyeve man shi ishu cii.

Iyange igenegh yô, Odongo due a ibyua er i za ya toho. Ibyua la za nyôr or ken sule. Orsule la vihi ishima a Odongo kpishi. A ta kume er un a yem a ibyua la ken ya na, aluer i za hemen u yan un iyiav yô.

Hii iyange la je wan la kera rumun er ibyua la i ya or kwagh ga.

Iyange igenegh yô, mbayev mbala za kasua vea Nyar-Kanyada. Ngô ve lu a kenti u teen akaa.

Kwagh doo Apiyo lu ôron ior ishe i akaa a ve lu teen la. Or a yam yô, Odongo a wase nan u wan ikyav.

Zum u iyange bee yô, ve tema ve ma ibyer imiôngo.

Shi ve wase ngô ve u vesen inyaregh ki ôron.

Ve tsa di ayange kpuee tsô memyol bee. Hingir u ve a hide a yem ken geri.

Nyar-Kanyada na Odongo idyer, shi na Apiyo sueta. Mama shi wa ve akaa a yan kpishi.

Zum u ter ve za va u kuan a ve yô, kera sar ve u yemen ga. Ve gba zamber Nyar-Kanyada er a yem ken geri vea ve.

Mama se, kaa a ve er, m bee iyol u za lun ken geri hegen. Me lu kenghen shie u shi ne va la.

Odongo man Apiyo cii ve za kuve mama kyamaa, ve mase kaan a na er, saa shie ugenegh.

Zum u Odongo man Apiyo ve hide ken makeranta yô, ve ôr ahuraior ve er iyange ve za memyol ken ya yô. Mbayev mbagenev kaa er uma u ken geri hemba doon, kpa mbagenev kaa er, u ken ya la hemba doon.

Kpa ve cii ve rumun er, Odongo man Apiyo iyange ve za ya tar vea ngô ve u vesen.