Iyange se za kohol hen hunda u Aya u ungwan ukwaghalôm nav. Se tema se kase usu, shie u asan a dugh yô.

Aya lu ôron se kwaghalôm na u masetyô hen tugh mbula. "Alôm man Nor ve wa ndor shi ve lu ahuraior."

Alôm iyange soo ijor, kpa gema wa hwev kpishi a tom u ken ityev. Nahan a za ii ijor hen Nor.

Hen inyom la Nor gema lôô ayaba man agbôdo kpishi. Nahan Alôm kera zua a ijor ya ga.

Alôm tsa ijen ayange imiôngo. Maa mase kaan er un a za ii ayaba ken sule u Nor.

Nor iyange kav er or nan lu iin wen mbaayaba yô. Mogh za hen Alôm za kaa a na er, "Or nan ngu iin hen a mo."

Alôm pine er, "Man ormbaiv la ka ana di?"

Nor maa tôô imio, "Me kôr ormbaiv la! Aaah! Me kôr ormbaiv la! Ooo!

Kwagh cier Alôm iyol.

Nor za kaa a Bagu a er a kuran wen sule. Ayange ahar cii Alôm kera due iv ga, pepe man tugh cii.

Bagu kpa kura sule la vôr, kôr or môm ga.

Kpernan sev mbu aven yô, Alôm shi due iv yem ken sule u Nor.

Lu iyange la keng Nor kpa za u za nengen tom na ye, Alôm yevese za yer shin ahu a agbôdo.

Nor nenge er ahu a la tenger yô, maa hii imio i wan, "M kôr ormbaiv ve! Aah! M kôr ormbaiv ve! Ooh!"

Nor ker hanmaijiir kpa nenge a ormbaiv shon ga.

Iyange igenegh sev shi hungwa av, Alôm shi yar iin Nor iyiav.

Nor shi va due heregh, Alôm tsuwe nyôr ken ityamegh ki agbôdo ki zegenan.

Nor nenge er kwagh tenger yô, maa a kaa er, "Ooo! Ityamegh ki agbôdo kin kehe doo u yan. Me ya ki atetan ne."

Maa Nor tôô ki mena cica!

Alôm nôngo u tsuwen duen kera kpa fatyô ga.

Lu Nor inja er kwagh ngu tsuwen wen shin uya yô, a kaa er, "Man ka nyi agbôdo a tsuwen mo shin uya nee?"

Nor maa sua agbôdo la kera. Cii u a za ikyua a nenge a kwagh u lu keregh la yô, Alôm tsuwe kar ayem, yevese sha afatyô na cii.

Nor tsa kôr ormbaiv la ga.

Aya kaa a vese er, "Ka pe kwaghalôm wam a yav a ver ityogh je la."

Se cii se ger ser, "Se sugh'u Aya." Maa se yem se za yav, hanmô wase yem henen sha ukwaghalôm mba Aya.