Kpentar u Sinyaire ngu shin pev, iwyo kase tar la yisa. Iyô gema ngi ken akô a a lu sha iwyo la kpishi.

Iyô i vesen la mba yel i er, Unyalego. Iyô la cien ior kpishi. Iyô la iyange i va mena ivyo kua iyôngo hen tar la kpaa.

Iyange sev hungwa av tsô, anngbyanev mbala: Apiyo, Ajoh man Atieno, ve za u za taven ikyon ken ikyô.

Ngô ve u vesen ta ve icin er, "Paregh nen iyô i i yel er Unyalego la. Dugh ikyon sha yô, de tee nen kwagh ugenegh ga."

Iyange ngô ve lu lamen kpa Ajoh ver ishima heregh ga.

Mbayevkasev mbala wa akaa a yan er: ayaba, atsaka, atumbaabua man shi mngerem ma man cii.

Ve tôô ikyor i za kangen ikyon kua shi ishôm i gberen ikyon kpaa.

Maa ve gba yemen ken ikyô.

Er ve lu yemen sha gbenda la, ve lu lamen sen je.

Ica gbe ga yô, Apiyo, u lu u vesen la kaa a ve er, "Huan nen viing. Ka heen iyô i Unyalegoo la i lu ye."

Atieno felegh anngbyanev nav er, "Nenge nen, Unyalego ngun a ver anyi na a zanaria heen ne. Se tôô nen."

Apiyo venda a ve er, "De hungur nen icintan i mama ga. Gba u se tôô kwagh ugenegh heen ga saa ikyon tseegh."

Ajoh kaa a ve er, "M na jighjigh a kwagh u mama a er la ga. A ôr kwagh la sha u yangen se akaa a dedoo ken ikyô. Mo m soo inyigh ki zanaria ki la."

Kwaghôron la za ve iyol kpa kwagh gba Ajoh sha mi ga.

Ka hen zum la voogh Unyalego va u va tôôn anyi na a zanaria ye. Ishima vihi un keregh er iyange zua a mi ga yô.

Maa Unyalego ungwa er iyange ve lu lamen sen yô. A za yer ken iwyen ikyua a gbenda pe fa er ve a va kar keng la.

Ica gbe ga yô, ve gba hiden a ikyon i iyange ve za tav la. Maa ve ungwa. "Hsssssss!"

Lu Unyalego tile aver zwa zegenan u nyiman or ye.
Kwagh cier mbayev kasev mbala iyol.

Unyalego pine ve er, "Ka an nan tee'm inyigh ki zanaria?" Mô ve kpa na ikyar ga.

Unyalego er mhen u fan or shon fese. A kaa er, "Ka or nan lu a ishô la tseegh nan a wa imio tsembelee ye, shi nan a yem ken ya a ikyon i nan. Kpa or u nan lu a ibyo yô, nan a fatyô u wan imio tsembelee ga, shi me mena nan!"

Apiyo za hemen wa imio tsembelee:

Ka mo ga, ka mo ga,
Ka mo m tee inyigh ki la ga,
U a tee la ngu ken ijime yam.

Atieno kpa wa imio, shi wa i tsembelee.

U mase wan imio yô, lu Ajoh. Ngbogh a mciem iyol kpishi. Hii imio i wan kpa due doo ga, shi asember la kpa wase ga.

Unyalego ngor a na er, "U ngu fantyô u wan imio er ka mbagenev mbala gaa?" Maa Unyalego fa je er ka wen a tee inyigh ki zanaria ki la ye.

Unyalego aver zwa zegenan mena Ajoh. Anngbyanev nav yevese yem ken ya. Ve za ôr hanmaor kwagh u iyange za hemen yô.

Ngô ve u vesen kaa a ve er, "M te ne icin, un a ongo yô, zayol ma a lu ga."