Usu, Mngerem, Mimi man Aie iyange ve lu ahuraior.

kpa lu kwagh u doon Aie tsembelee ga, nahan soo u eren ahuraior na cii a hingir ityogh gondo.

Iyange igenegh sev hungwa av tsô Aie pine er, "Er nan se cii se dugh se za ker inya i gbirinigh ii se tema twev ga? Aluer se er nahan yô, hanmaor nan a lu a ipyaven u nan.

Ve cii ve rumun maa ve kar ve gba yemen je.

Aie za pe Mngerem lu la za kaa er, "Usu ka orhyom wase. Ka a nande hanmakwagh cii. A gba pe se ker ijiir a Usu shio."

Mngerem pine er, "Nahan u soo wer se er nena?"

Aie kaa er, "Jighlii je yô, a gba pe se wua Usu. Man ka we u lu a tahav mbu eren kwagh la ye. Usu a teman inya yô, we Mngerem u za haa un iyol maa kwagh a bee!"

Mngerem kaa er, "Aluer m za haa sha usu man m kar m za haa ken inya m kera fatyô u hingir jindi imiôm ga ye?"

Aie kaa er, "Zayol ngu ga, me kase awen sha er u za haa ken inya ga yô, shi me hide me kohol we u hingir jindi imiôm" Maa Aie gba a mi kohol awen je.

Iyange Usu za tema inya, fa kwagh u lu zan hemen kpaa ga, maa Mngerem kar za haa un iyol.

Ka pe iyange Aie mee pir Usu je la, maa shi ve kar ve gba yemen.

Shie kpuee yô, Aie pine Mngerem er, "Er nan u za tem sha igyungu u kenger tar cuku ga?"

Mngerem kpa kar za tema, tem yô, Aie kar zumbee za dugh iwyen i iyange Mngerem tema sha mi la.

Mngerem osogh haa inya maa kwagh u ma bee.

Aie shi gema ishigh ver sha Mimi.

Mba za nyer hen zege wo ugenegh yô, Aie kaa a Mimi er a keghen wen shin inya.

Aie unde za menger zege iwyen er i za kighir Mimi shin inya.

Kpa iwyen la za te inya yô, akaa a dedoo due keregh er mba zanaria man mba azurufa nahan cii.

Mimi iyange war sha ikyughul.

Aie za hungwa er un a va nenge a gunduyol u Mimi. Kpa nyiishi nenge a akaa a dedoo.

Aie pine er, "Akaa ne due ka han?"

Mimi kaa er, "Ashen iwyen i za menger i va te'm iyol, yô ka akaa a a dugh keregh je ne." Akaa nyiishi yem saren Aie.

Aie kaa a mimi er, "Me lu shin inya hegen, we di unde sha wo za menger iwyen i zegenan se nenge."

Tsô Mimi unde yem sha wo za menger zege iwyen kende shin inya.

Zege iwyen la menger za cagh Aie sha ityo maa kpe kera!