Iyange sev hungwa av tsô, ter ugenegh lu, lu a ônov mba nomso uhar.

Iyange igenegh sev mbu hongo mbu aven yô, a yila mbayev mbala a kaa a ve er, "M bee iyol hegen, me kera ngôôr ku ga. Kpa cii maa ver me kpe yô, m soo mer hanmaor wen nan a lu a ya u nan. M na ne uer môm u eren kwagh la."

Tsô mbayev mbala kôr tom ave fese je.

U hiihii la yem hen kpegbenda, za gber ikyon hii u maan zege ya sha ci na.

U sha uhar la di yem u za yan ikyar a ior mbagenev mba ve lu wa ndor a ve yô.

Za hen ior atô kposo kposo, za hingir er ka wan hen ior mbala yô.

Uer ngu been yô, mbayev nomso mbala hide yem hen ya u ter ve.

Ter ve pine er, "Ne maa uyaav enev ne bee vee?" Ve cii ve na mrumun er, "Een."

Ter la za hen ya u wan u hiihii la. Za nenge er maa ayou a tsan keregh kpishi yô.

Er lu zenden nengen la, un a kar hen ingila je a pine er, "Or ngu ken iyou nee?"

Un a pine je, wan la a na ikyar er, "Ei."

Tsô shi ter la a kar a za ken hemen shi a pine, "Or ngu ken iyou ne jee?"

Shi wan a na ikyar a kaa er, "Ei."

Ijen kôr ter la, kpa ma or lu u nan wen kwaghyan hen ya la ga.

Tsô a kaa a wan u hiihii la er, "Se yem ken ya." maa ve yem.

Wan u sha uhar la yem a ior nav hen tsombor u hiihii u iyange za zua a mi la. A za pase ior nav hen ve, "Ka ter'm je ne, shi ka anngbyan wam je ne."

Tsombor la ngohol ve, i wua zege iyôngo i ember mve ve.

Tsô shi ve kar ve yem hen tsombor u sha uhar.

Wan la shi pase ter na man anngbyan na hen ve, mbala kpa er ve iniongo.

Ajiir a iyange ve lu zan cii ka pe iyange i ngohol ve tsembelee je la.

Ve ya kwaghyan ve ide. Maa ve yem hen ya u ter ve.

Tsô ter ve kaa er, "Ka kwagh u iyange m lu a mi ken ishima zum u m lu kaa mer hanmô wen a maa ya u nan je ne. Ya u lun a mi hemba ayou a lun a mi. Ya ka dooshima, msurshima man akar i yan vea ior mbagenev."