Ngise ngise la, iyange sev hungwa av tsô ijen gba sha tar u Taraba.

Je ior lu za timen amôndo a ishondokye er alaghga ve a zua a samuyia shin mi cuku a ya.

Orgenegh lu i yilan un er Vyandeh, iyange fatyô zua a kwaghyan na tsombor na ga.

Iyange igenegh yô, kaa a kwase na er, "De m due m za ker kwaghyan," Maa due yem.

Er or la lu ken zende la, kwase na kera fatyô u keghen ga.

Kwase na jiidi agbôdo a iyange za zua a mi hen ngô na yô, sha ci u mbayev nav: Vyangel, Avaungwa man Jessica.

Vyandeh lu hide fele ga, shi va a kwagh sha ci u tsombor na kpaa ga. Kwase na, Aershimana sugh un za hiden shi za hemen pine un er, "Kwagh ngu u mbayev a ya je kpa?" Or la venda er, "Ei."

Kwase na na un agbôdo, kpa ya kuma un ga.

Or la pine kwase na er, "Ka hana u za zoo a agbôdo?"

Aershimana na ikyar er, "Mama wam ver agbôdo sha toryouoo na."

Ka va kom ken atôutu yô, Vyandegh nder shi mogh sha.

A kure ken ishima na u zan hen ngô'na-kem za iin agbôdo a iyange mase shin la.

A yem a za tôô agôr.

Or la yem za ver agôr la maa unde sha tor u ngôkwase la.

Vyandeh gba meen zende sha tor yemen pe iyange i ver agbôdo la.

Ica gbe ga yô a za osogh sha toryouoo, a ayôôsu! Pararam!

A mogh sha fese.

"Bem a lu a we, ngôkwase, se mba ior mba sha kwavaôndo! M ngu môm ken mbautar mba ve lu van hen we yô. M ngu u hiihii, mbagenev kpa mba van," Vyandegh pase nahan.

Tsô ngôkwase la ngbogh a mciem iyol. Cier un iyol kpishi.

Ngôkwase ti kura ayem za sha hunda u yevese. Kpa Vyandeh kar fese vande gban ken won a ngôkwase la.

Hanmô ve nan lu zever mlyam yilan er i va wase nan, Vyandeh yevese yem vegher u sha ityoghkitaregh, ngôkwase la di yevese yem vegher u shin ityôtar.