Phumelele lu gumkwase hen tsombor u ican lu heregh kpishi yô.

Lu vea tsombor na hen zongo u Celani.

Gbenda gema lu môm tseegh u nyôron man duen ken zongo u Celani la.

Zege kon ne lu dondo a gar zongo la.

Zege iyô lu shi i tsaan sha kon la.

I gba u ior a kar shin itinekon la keng man ver nan a yem ken iyouci, kasua shin makeranta ye.

Zum u iyô la i ongo orumace acin cii yô, iyange i hungwa sha gbaakon i yisa gbenda.

Iyô la na yô, lu ican kpishi u ior ve kar sha gbenda la yô.

Ior mba hen zongo la ker igbinda i kôron iyô la kpa ve lu fantyô ga.

Mô or tsô nan lu fatyô u kôron iyô la ga.

Kwagh gande Ortar u hen zongo la ver iyua sha ci u or nan a kôr iyô la cii.

Kpa lu nomsombaiorov tseegh i na ve ian i nyôron gesa shon ye.

Nomsombaiorov mba sha hanma kov cii nôngo kpa kanshio u kôron iyô la.

Mbagenev zua ave hingir iorov imiôngo, ve za kpa shi ve fatyô u kôron iyô la ga.

Iyange i cier iyol u nyôron man shi duen ken zongo la sha hanma shie cii.

Phumelele iyange mogh za hen Ortar za zamber a na er, "Na'm ian mo kpa m nyôr gesa ne."

Ior gba sen un sha ciu un ngu kwase. "Gumwase ne ngu eren ka asenge," ve lu kaan wen imbwase nahan.

Kpa Ortar yô, gema lu henen kwagh sha mkaanem ma Phumelele lu lam la.

Ortar hen ken ishima nahan er, "Nomsombaiorov mba hen zongo ne cii kashio u kôron iyô ne. Ka kwaghbo u nan gumkwase ne ian ga."

Tsô Ortar na Phumelele ian. Kpa ken ishima na yô, na jighjigh a na keng ga, sha ciu nomsombaiorov kpa za fatyô ga.

Phumelele gema lu a mhen u dedoo.

Gumkwase la tume ikyese wa ingbye sha kuur la sha er i a fatyô u wuhen yô.

Tôô ikyese na sha ityo tsô mogh gba yemen pe kon la lu la.

Er i vanden eren keke la, tsô iyô la shi ungwa acin gba van. I kegh iyol u hungwan shi yisan gbenda.

Phumelele lu vande wan iyol keghen a kegh!

"Ka iyange shon je ne," lu henen ken ishima er lu zan ikyua a kon la yô.

Zum u iyô la tsoo sha kon yô, maa i haa lu shin ikyese la.

Phumelele osogh ingbye la fese maa ikyese cir kuur gbim! Cir iyô shin mi gbim!

Phumelele hide a ikyese la a iyô shin mi yem a mi ken zongo la.

Ior cii ger diing er lu nyôron sha hunda u shin kwator la yô.

"Phumelele ngu a mfe shi a tsoghor ishima. Ortar a kure ityendezwa na," ior cii lu sha ijô zever zever nahala.

Ortar kpa kure ityendezwa na sha u nan Phumelele ijiir kpishi i kahan tom, kua shi ibyua sha mi gbing.

Gumkwase la hingir môm ken mbahemenev hen zongo la. Ior kpishi zaan hen na u za zuan a kwaghwan.

Iyange i yem a iyô la i za kende pe koson inyam, hingir u mba hen zongo la kpa ve a zende gbagesaa sha asema a ve.