Wadudu wadaishi kwa mazingira tofauti tofauti. Wadudu wamu wadaishi andukumweri na wamu wadaishi umweri umweri.

Ichi chuo cha sitori chawehusu Naeku na Naserian -misaghu iwi ra waka rivalo ni mvi umweri ridakaiya kwa nyika ra kusini isanga ja Kenya.

Iri misaghu iwi ridakaiya kwa kikundi cha misaghu rimu 80,000.

Kipughi cha msaghu chadakaiya kwa kisaghu chipoisiro na wudongo. Icho kisaghu chadima chikaiye nandonyi ya ndoe angu naighu, angu rose wokoni.

Ughu mpande ghuwonekaa cha shighadi ghwadawangwa kisaghu. Visaghu vingi vidakaia na wulacha ghwa mita iwi mpaka isanu naighu ya ndoe.

Kila musaghu kwa kipughi ghoka na shughuli tofauti tofauti rebonya kwa ajili ya wambao kwa kikundi. Naeku na Naserian ni wabonyi kazi wa musaghu. Wabonyi kazi wose ni musaghu gwa waka. "Isi ni waaghi," niko Naeku ughorie.

Musaghu wabonyi kazi widaagha na kuzighana kisaghu. Naserian ukaghora, "Dadaagha maaghi ghikurie mabaha mabaha."

"Sigha dieleze seji diaghaa mizi redu," Naeku ukafunya maoni. "Didazoya kuagha kwa kukota mitaro ndoenyi."

Naserian ukangiria ukaghora, "Didatumia mizu redu riko na ndighi kukota ndoe. Dadasukuma ndoe nyingi!"

"Eri dikaie na wuloli kukaia nganda ra mitaro redu reko na ndighi dadarifinikira na wudongo ghokakadia ghwapoiswa na mada na ndoe," Naserian ukaghora huwo.

"Ugho wudongo ghokakadia ghukaoma, ghudakua kuu saa ughuja ghopoisa nyungu. Kisaghu chadima kukaia luma sana," Naeku ukachuria.

"Dadaduka irija ndoe dakota na kuritumia kuagha kisaghu naighu. Icho kisaghu chidakaiya cha mviringo angu chisongokie nokoighu, na mitaro nyingi," Naserian ukaghora huwo.

"Visaghu vimu vidakaia ighu kama mita ikenda!" Naeku ukaghora huwo.

Musaghu ni wadudu wiko na wumeri nandighi na wadaishi kwa vipughi vibaa vibaa. Kila musaghu ghoka na majukumu ghake tofauti tofauti ghepoisa na kuwona kipughi chawo chaweendelia nicha.

Misaghu wabonyi kazi sa Naserian na Naeku wadakota na kuagha visaghu. Musaghu askari niwo wilindiagha kisaghu. Wabonyi kazi na maaskari wose wadaenda wikilola andu kuwishi koagha visaghu.

Misaghu wauguzi niwo wizighanagha mbaha wawo wa waka na misaghu iri ndini ndini riwangwagha mabuu.

Kisaghu cheka na mpande zima zima. Koka na vumba va mbaha, vumba va mabuu, na vumba vewika vindo. Mitaro niro riunganishagha iro mpande rose.

Mbaha wawo wa waka oka na mumbi mbaha nandighi na wadima kuishi maisha malacha kuchumba wose.

Naserian ukaendelia kughora, "Dadaagha mitaro refuma cha shighadi eri mbeo ielie ingie kisaghunyi."

Naeku ukachuria, "Misaghu radakunda mbeo ielie eri ghudime kuishi."

Naserian ukaeleza kukaia, "Iro mitaro ridatesia kuwika mruke ghufwane andenyi ya kisaghu eri kisaghu chisekaie na mruke mubaha."

"Dadakaia na mbuwa andenyi kisaghunyi, didalima kuvu. Dadashoashoa midi ndini ndini na vilambo vimu va kiasili alafu didavitumia kuvarisha kuvu," Naserian ukaghora.

"Jhapoiye!" Naeku ukashinika. "Iri mbuwa ra kuvu radajisha kipughi chose cha msaghu. Ni isi aina ya musaghu dieka dilima kuvu."

Vipughi va musaghu vadakaia na mbaha wa kiwaka na wa kiwomi. Wabonyi kazi wadawijisha na kulindia iri misaghu rifwane nandighi andenyi ya kipughi chawo.

Musaghu mbaha wa kiwaka ghwadaishi miaka mirongo iwi mpaka mirongo idadu. Gwadima kuva maghi zaidi ya milioni maishenyi ghake. Mabuu ghadafumiria kwa maghi alafu musaghu muuguzi udaghizighana.

Naserian ukaghora huwu, "Vipughi va msaghu veka na mpangilio. Kila musaghu ghwadachangia kusimama na kuzoghua kwa kipughi chawo."

Naeku ukachuria, "Kila umweri oka na kazi ye bonya na wadaibonya. Misaghu radabonya kazi kwa wumweri."

"Ni loli," Naserian ukarumiria. "Sasa diwurie malagho ghelima!"